["Подшоҳлик қўлида бўлган Зот баракотли бўлди. У ҳар нарсага Қодирдир.","У шундай Зотки, қайси бирингиз яхшироқ амал қилишингизни синаб-билиш учун ўлим ва ҳаётни яратди. У Азиз ва Кечиримли Зотдир.","У шундай Зотки, етти осмонни устма-уст қилиб яратди. Раҳмоннинг яратишида бирон тафовутни кўрмайсиз. Бас, қайта назар солинг-чи, бирон камчиликни кўрармикансиз?","Кейин қайта-қайта назар солинг, кўзингиз сизга чарчаб, ҳолдан тойиб қайтади.","Дарҳақиқат, яқин осмонни чироқлар билан безадик ва уларни шайтонларга отиладиган тошлар қилиб қўйдик. Улар учун олови қизиб турган жаҳаннамни тайёрлаб қўйганмиз.","Парвардигорларига куфр келтирганлар учун жаҳаннам азоби бордир. Нақадар ёмон оқибат бу!","Унга улоқтирилган пайтларида қайнаб турган жаҳаннамнинг бир хунук ўкиригини эшитадилар.","У ғазабдан ёрилиб кетгудек бўлади. Ҳар қачон унга бир тўда (осийлар) ташланганда, унинг қўриқчилари: «Сизларга огоҳлантирувчи келмаганмиди?», деб сўрайди.","Дейдилар: «Ҳа, бизга огоҳлантирувчи келганди. Уни ёлғончига чиқариб, Аллоҳ ҳеч нарсани нозил қилган эмас, сизлар эса катта залолатдасизлар, холос, деган эдик».","Дедилар: «Қулоқ солганимизда ёки ақлни ишлатганимизда эди, дўзахийлар орасида бўлмаган бўлардик».","Бас, улар ўз гуноҳларини эътироф этдилар. Йўқолсин дўзахийлар!","Парвардигорларидан ғойибона қўрқадиганлар учун мағфират ва улкан савоб бордир.","Гапингизни сир тутасизми ёки ошкора айтасизми, албатта, У кўнгиллардагини ҳам Билгувчи Зотдир.","Яратган Зот Ўзи билмасми? Ҳолбуки, У Меҳрибон ва Хабардор Зотдир.","У шундай Зотки, ерни сизларга бўйсунадиган қилиб қўйган. Унинг ҳар тарафида юринглар ва ризқидан тановул қилинглар. Қайта тирилиб бориш ҳам ёлғиз Унинг ҳузуригадир.","Осмондаги Зот сизларни титроқ босиб турган ерга юттириб юборишидан хотиржаммисизлар?","Ёки осмондаги Зот устингизга тош ёғдиришидан хотиржаммисизлар?! Ҳали огоҳлантиришим қандай эканини билиб оласизлар!","Дарҳақиқат, улардан олдингилар ҳам ёлғонга чиқарган эдилар. Бас, инкорим қандай бўлди?!","Устларидаги қанот ёйган ва йиққан ҳолдаги қушларни кўрмадиларми?! Уларни ёлғиз Раҳмонгина ушлаб турар! Албатта, У барча нарсани Кўргувчидир.","Раҳмондан бошқа сизларга ёрдам берадиган, сизлар учун қўшин-ёрдамчи бўлган ким бор экан?! Кофирлар фақат алданишдадирлар.","У ризқни тортиб қўйса, сизга ризқ берадиган ким ўзи?! Йўқ! Улар борган сари ҳадларидан ошиб, ҳақдан йироқлашиб бораверадилар.","Юзтубан қоқилиб юраётган киши ҳидоятдароқми ёки тўғри йўл устида қоматини тик тутиб бораётган кишими?","Айтинг: «У сизларни йўқдан бор қилган ва сизларга қулоқ, кўз ва ақлни берган Зотдир. Сизлар эса жуда оз шукр қиласизлар».","Айтинг: «У сизларни ер юзида яратган Зотдир. Ва Унинг ҳузурига тўпланурсизлар».","«Агар ростгўй бўлсангизлар (айтинглар-чи), мана шу ваъда қачон бўлади?» - дейдилар.","Айтинг: «Албатта, илм фақат Аллоҳнинг ҳузуридадир. Мен эса бир очиқ огоҳлантирувчиман, холос».","Уни яқиндан кўрганда куфр келтирганларнинг юзлари қорайиб кетади ва уларга: «Сиз истаган нарса мана шу», дейилади.","Айтинг: «Айтинглар-чи, агар Аллоҳ мени ва мен билан бирга бўлганларни ҳалок қилса ёки бизга раҳм қилса, кофирларни аламли азобдан ким ҳимоя қилади?!»","Айтинг: «У Раҳмондир. Унга иймон келтирдик ва Унга таваккал қилдик. Ким очиқ залолатда эканини яқинда билиб оласизлар».","Айтинг: «Айтинглар-чи, агар сувларингиз ерга сингиб кетса, сизларга ким оқар сувни келтириб беради?!\"","Нун. Қалам ва у битадиган битикларга қасам.","Сиз Парвардигорингиз марҳамати ила мажнун эмассиз.","Албатта, сиз учун битмас-туганмас ажр мукофот бордир.","Албатта, сиз улуғ хулқ устидадирсиз.","Яқинда сиз ҳам кўрасиз, улар ҳам кўрадилар.","Қайси бирингиз мажнун эканини.","Албатта, Парвардигорингизнинг Ўзи Унинг йўлидан адашганларни ҳам жуда яхши билгувчидир ва У ҳидоят топгувчиларни ҳам жуда яхши билгувчидир.","Бас, ёлғон деювчиларга итоат этманг.","Муроса қилишингизни истайдилар. Шунда улар ҳам муроса қиладилар.","Итоат қилманг! Ҳар бир қасамхўр, пасткашга.","Ғийбатчи-ю, гап ташувчига.","Яхшиликни қизғанадиган тажовузкор, сергуноҳга.","Қўпол ва ундан кейин отасининг тайини йўққа.","Мол-давлати ва ўғиллари кўп бўлгани учун","Оятларимиз унга тиловат қилинса: «Аввалгиларнинг афсоналари», дейди.","Яқинда унинг тумшуғига тамға қўямиз.","Биз уларни боғ эгаларини синаганимиздек синадик. Ўшанда эрта тонгда териб оламиз, деб қасам ичгандилар.","Истисно қилмагандилар.","Улар ухлаб ётганда, боғнинг устидан Парвардигорингиз тарафидан бўлган бир айланувчи айланиб чиқди.","Бас, у худди меваси териб олинганга ўхшаб қолди.","Тонг саҳарда бир-бирларини чақирдилар.","Агар терадиган бўлсангиз, экинзорингизга эртароқ боринг, деб.","Бас, пичирлашиб кетдилар.","Бугун устингизга бирон мискин кириб қолмасин-да.","Тонг-саҳарлаб мақсадига қодирдек йўлга тушдилар.","Уни кўрганларида, биз адашибмиз, дедилар.","Йўқ, маҳрум бўлибмиз.","Уларнинг инсофлироғи: «Сизларга тасбеҳ айтинглар, демаганмидим», деди.","Дедилар: «Парвардигоримизни поклаймиз. Дарҳақиқат, биз золимлар бўлдик», дедилар.","Бир-бирига қараб, бир-бирини маломат қила бошладилар.","Дедилар: «Вой, шўримиз қурсин, ҳаддимиздан ошибмиз».","Шояд, Парвардигоримиз бизга ундан ҳам яхшироғини алмаштириб берса. Албатта, биз ёлғиз Парвардигоримизга рағбат қилгувчилармиз.","Азоб шундоқ бўлур ва агар билсалар, албатта, охират азоби янада улканроқдир.","Албатта, тақводорлар учун Парвардигорлари ҳузурида ноз-неъмат боғлари бордир.","Мусулмонларни жиноятчилар каби қилиб қўярмидик?!","Сизларга нима бўлди?! Қандай ҳукм чиқармоқдасизлар?","Ёки сизларнинг китобингиз бўлиб, уни ўқияпсизларми?","Унда сизларга истаган нарсангиз (муҳайё қилинади), дейилганми?","Ёки сизларга Бизнинг Қиёмат кунигача етадиган берган ваъдаларимиз бўлиб, унда: «Албатта, сиз нима ҳукм қилсангиз, шу бўлади», дейилганми?!","Улардан сўранг-чи, қайси бирлари бунга кафил бўла олар эканлар?!","Ёки уларнинг шериклари бормикин?! Агар ростгўй бўлсалар, ўша шерикларини ҳам олиб келсинлар!","Болдирлар очилиб, сажда қилишга чорланадиган кунда қодир бўлмаслар.","Кўзлари эгилган, хорлик уларни эгаллаб олган. Ҳолбуки, улар соғ-саломат пайтларида сажда қилишга чақирилгандилар.","Бу гапни ёлғонга чиқарувчиларни Менга қўйиб беринг. Яқинда Биз уларни ўзлари билмаган тарафдан аста-секин (ҳалок қиламиз).","Уларга муҳлат бериб қўяман. Албатта, Менинг «макрим» жуда қаттиқ.","Ёки сиз улардан ҳақ сўраяпсиз-у, улар тўловдан қийналиб қоляптиларми?","Балки, уларнинг ихтиёрида ғайб (илми) бўлиб, улар ёзиб олаётгандирлар?!","Парвардигорингиз ҳукмига сабр қилинг ва балиқ соҳибига ўхшаманг. Ўшанда у ғамга ботган ҳолида нидо қилганди.","Агар унга Парвардигори тарафидан бир неъмат етмаганида, аниқ қуруқликка мазамматланган ҳолида улоқтирилган бўлар эди.","Бас, уни Парвардигори танлаб олиб, солиҳ бандаларидан қилди.","Албатта, куфр келтирганлар Қуръонни эшитган вақтларида сизни кўзлари билан йиқитаёзурлар ва у аниқ мажнундир, дейдилар.","Ҳолбуки, у бутун оламлар учун эслатмадан ўзга нарса эмас.","Аниқ рўй бергувчи.","Ўша аниқ рўй бергувчи нимадир?","Сиз аниқ рўй бергувчи нима эканини қаердан ҳам билар эдингиз?","Самуд ва Од қаттиқ қоқувчини ёлғонга чиқаришди.","Самуд эса ҳаддан ташқари қаттиқ нарса билан ҳалок қилинди.","Од қавми эса қутурган бўрон билан ҳалок қилинди.","У Зот шамолни уларнинг устига пайдар-пай етти кеча ва саккиз кундуз ҳоким қилиб қўйди. Бас, кўрасизки, у ердаги қавм худди чириб, ичи бўшаб қолган хурмо дарахтининг таналаридек ўлиб ётадилар.","Улардан бирортасининг боқий қолганини кўрасизми?","Фиръавн ҳам, ундан олдингилар ҳам, остин-устун бўлган қишлоқлар ҳам хато қилгандилар.","Улар Парвардигорларининг пайғамбарига итоатсизлик қилдилар. Бас, У Зот уларни жуда қаттиқ ушлади.","Биз сув туғёнга тушган вақтида сизларни кемада кўтардик.","Сизларга эслатма-ибрат қилиш ва англагувчи қулоқлар англаб олишлари учун (шундай қилдик).","Бас, қачон Сур бир бор чалинганида.","Ва еру тоғлар кўтарилиб, бир бор силкитилганида.","Ана ўша кунда Воқеа воқеъ бўлур!","Ва осмон ёрилур! Чунки у ўша кунда заиф бўлур!","Ва фаришталар унинг чор-атрофида турадилар. У кунда уларнинг устида Парвардигорингизнинг Аршини саккиз (фаришта) кўтариб туради.","Бас, ўша кунда кўрикдан ўтасизлар, бирон сирингиз махфий қолмас.","Бас, кимнинг китоби ўнг қўлидан берилса, у шундай дейди: «Мана, менинг китобимни ўқиб кўринглар!","Мен ҳисоб-китобимга йўлиқишимни билган эдим».","Бас, у розилик ҳаётидадир.","Олий жаннатдадир.","Унинг мевалари яқиндир.","(Уларга): «Ўтган кунларда қилиб ўтган амалларингиз учун мана энди бемалол еб-ичинглар», (дейилади).","Китоби чап қўлидан берилган кимса эса шундай дейди: «Эҳ, китобим менга берилмаганида қанийди.","Ҳисоб-китоб нималигини билмасам эди.","(Бу дунёдаги ўлим) охиргиси бўлса қани эди.","Молу мулким менга асқотмади.","Салтанатим ҳам барбод бўлди».","(Айтилади): «Уни ушланглар, кишанланглар!","Кейин дўзахга ташланглар!","Кейин узунлиги етмиш газ бўлган занжирга солиб боғланглар!","У улуғ Аллоҳга иймон келтирмаган эди.","Ва мискинларга таом беришга тарғиб қилмаган эди».","Бас, бугун унга бу ерда бирон чин дўст йўқ.","Йирингдан ўзга таом ҳам йўқ.","Уни осийларгина ейдилар.","Сизлар кўриб турган нарсаларга қасам ичаман.","Сизлар кўрмайдиган нарсаларга ҳам.","Албатта, у (Қуръон) буюк Элчининг сўзидир.","У бир шоирнинг сўзи эмас. Сизлар жуда оз ишонасизлар.","У фолбиннинг сўзи ҳам эмас. Сизлар жуда оз ибратланасизлар.","У оламлар Парвардигори тарафидан нозил қилинган.","Агар у Бизнинг шаънимизга айрим сўзларни тўқиб олганида,","Албатта, Биз уни куч билан ушлар эдик.","Кейин унинг шоҳтомирини узиб ташлаган бўлар эдик.","Бас, сизлардан ҳеч ким уни тўсиб қолгувчи бўлмас.","У тақводорлар учун эслатмадир.","Биз сизларнинг орангизда ёлғонга чиқарувчилар борлигини аниқ биламиз.","У кофирлар учун ҳасрат-надоматдир.","У аниқ Ҳақиқатдир.","Бас, улуғ Парвардигорингиз исмини покланг, тасбеҳ айтинг.","Бир сўрагувчи тушгувчи азоб ҳақида сўради.","Кофирлар учун уни даф қилиб берадиган кимса йўқдир.","У меърожлар соҳиби бўлмиш Аллоҳ тарафидандир.","Фаришталар ва Руҳ Унинг ҳузурига миқдори эллик минг йил бўлган кунда кўтарилурлар.","Бас, чиройли сабр қилинг.","Улар у (Кун)ни узоқ деб биладилар.","Биз эса унинг яқинлигини биламиз!","У кунда осмон эритилган мисга ўхшаб қолади.","Тоғлар эса худди титилган жунга ўхшаб қолади.","Бирон дўст дўстидан (ҳол-аҳвол) сўрамас.","Улар (бир-бирларига) кўрсатилурлар! Жиноятчи у куннинг азобидан қутулиш учун ўз ўғилларини фидо қилиб юборишни истаб қолади.","Хотинини ва ака-укасини ҳам.","Уни ўз паноҳига олган қабиласини ҳам.","Ер юзидаги барча одамларни ҳам фидо қилиб юборишни истайди. Кейин (шу берганлари) унга нажот беришини хоҳлайди.","Йўқ! Албатта, у бир ловиллаб ёнаётган оловдир.","Бош терисини сидириб олувчидир.","У юз ўгириб, терс қараб кетган кимсани чақиради.","Йиғиб, беркитганни ҳам.","Дарҳақиқат, инсон бетоқат қилиб яратилгандир.","Унга ёмонлик етса, оҳ-воҳ қилгувчидир.","Яхшилик етганда эса қизғанчиқдир.","Намозхонлар бундан мустасно.","(Намозхонлар)ки, намозларида барқарордирлар.","(Намозхонлар)ки, молу мулкларида маълум ҳақ бордир.","Тиланчи ва бечоралар учун.","(Намозхонлар)ки, Қиёмат кунини тасдиқ этадилар.","(Намозхонлар)ки, Парвардигорларининг азобидан қўрқадилар.","Зотан, Парвардигорларининг азоби бехатар эмасдир.","(Намозхонлар)ки, авратларини сақлайдилар.","Ўз жуфти ҳалоллари ва қўл остидагилари бундан мустасно. Улар маломат қилингувчи эмаслар.","Ким шундан ортиғини талаб қилса, бас, ана ўшалар ҳаддан ошувчилардир.","(Намозхонлар)ки, омонатларига ва аҳдларига вафо қиладилар.","(Намозхонлар)ки, гувоҳликларини тўғри адо этадилар.","(Намозхонлар)ки, намозларини муҳофаза қиладилар.","Ана ўшалар жаннатларда ҳурмат кўргувчилардир.","Куфр келтирганларга не бўлдики, сиз томон бўйин чўзиб чопмоқдалар?","Ўнг тарафдан ҳам, чап тарафдан ҳам тўп-тўп бўлиб?","Ё улардан ҳар бир кимса ноз-неъмат жаннатига киритилишни тама қилурми?!","Йўқ! Албатта, Биз уларни ўзлари билган нарсадан яратганмиз.","Машриқу мағриблар Парвардигорига қасам ичаманки, албатта, Биз Қодирмиз.","Улардан яхшироқларини алмаштириб қўйишга. Биз бу ишни қилишдан ожиз эмасмиз.","Уларни тек қўйинг. То ваъда қилинган кунларига рўбарў келгунларига қадар ботаверсинлар, ўйнаб-кулаверсинлар.","У кунда худди бутларга шошаётгандек, қабрларидан шошиб чиқурлар.","Нигоҳлари ерга қадалган, ўзларини хорлик қоплаб олган ҳолда турадилар. Бу ўша уларга ваъда қилинган кундир.","Биз Нуҳни: «Қавмингни уларга аламли азоб келишидан аввал огоҳлантиргин», деб ўз қавмига пайғамбар қилиб юбордик.","Деди: «Эй қавмим, албатта, мен сиз учун очиқ огоҳлантирувчидирман.","Аллоҳга ибодат қилинглар, У Зотдан қўрқинглар ва менга итоат этинглар.","Гуноҳларингизни мағфират қилур ва сизларни белгиланган муддатгача тирик қолдирур. Агар биладиган бўлсангизлар, Аллоҳнинг муддати келган вақтида асло кечиктирилмас».","Деди: «Парвардигорим, мен қавмимни кечаю кундуз даъват қилдим.","Менинг даъватим уларга фақат қочишни зиёда қилди, холос.","Мен қачон уларни Сенинг мағфиратингга даъват қилсам, улар бармоқларини қулоқларига тиқиб, кийимларини ўраб-чирмаб олдилар ва оёқ тираб турдилар ҳамда мутакаббирлик қилдилар.","Кейин мен уларни ошкора даъват этдим.","Кейин даъватимни очиқ эълон ҳам қилдим, пинҳона ҳам айтдим».","Дедим: «Парвардигорингиздан мағфират сўранглар, албатта, У ўта Мағфиратли бўлган Зотдир.","У Зот осмондан устингизга кетма-кет ёмғир ёғдиради.","Сизларга мол-дунё, бола-чақа билан мадад беради ҳамда сизларга боғу бўстонлар қилиб беради ва сизларга оқар дарёлар қилиб беради.","Сизларга нима бўлдики, Аллоҳнинг буюклигидан ҳайиқмайсизлар?","Ҳолбуки, У Зот сизларни босқичма-босқич яратди-ку!","Кўрмадингизмики, Аллоҳ таоло етти осмонни қандай устма-уст қилиб яратди?!","Улар орасидаги ойни нур, қуёшни эса чироқ айлади.","Аллоҳ сизларни ердан ундириб чиқарди.","Кейин сизларни унга қайтаради ва яна чиқариб олади.","Аллоҳ сизларга ерни гиламдек тўшаб қўйди.","Ундаги кенг йўлларда юришларингиз учун».","Нуҳ деди: «Парвардигорим, дарҳақиқат, улар менга итоатсизлик қилиб, мол-дунёси ва бола-чақаси ўзига фақат зиённи зиёда қилган кимсаларга эргашиб кетдилар».","Жуда катта макр қилдилар.","Дедилар: «Сизлар ҳаргиз ўз худоларингизни тарк қилманглар! Вадни ҳам, Сувоъни ҳам, Яғусни ҳам, Яуқ ва Насрни ҳам ҳаргиз тарк қилманглар!»","«Дарҳақиқат, улар кўпларни адаштирди. Бу золимларга залолатдан бошқани зиёда қилма».","Улар хатолари туфайли ғарқ қилиниб, дўзахга киритилдилар. Бас, ўзларига Аллоҳдан ўзга ёрдамчи топа олмадилар.","Нуҳ деди: «Парвардигорим, ер юзида кофирлардан биронта қимирлаган тирик жонни қолдирма».","Сен уларни қолдирсанг, улар бандаларингни йўлдан оздирадилар ва фақат нонкўр, нопокларни туғиб-кўпайтирадилар.","\"Парвардигорим, Ўзинг мени, ота-онамни, менинг уйимга мўмин бўлиб кирганларни ва барча мўмину мўминаларни мағфират этгин, золимларга эса фақат ҳалокатни зиёда қилгин!\"","Айтинг: «Менга ваҳий қилиндики, жинлардан бир гуруҳи тинглади ва: «Биз бир ажойиб Қуръонни эшитдик», дедилар».","«Тўғри йўлга ҳидоят қиладиган (Қуръонни тингладик) ва унга иймон келтирдик. Энди биз Парвардигоримизга ҳаргиз бирон кимсани шерик қилмасмиз».","«Дарҳақиқат, Парвардигоримиз буюклиги юксак бўлди. У бирон жуфт ва ё фарзанд тутган эмас».","Орамиздаги бир аҳмоқ Аллоҳ шаънига ноҳақ сўз айтар эди.","Биз инс ҳам, жин ҳам Аллоҳ шаънига ҳаргиз ёлғон сўзламас, деб ўйлар эдик.","Дарҳақиқат, айрим инсон кишилар жин кишилардан паноҳ сўрар эди. Бу иш уларнинг ҳаддан ошишини янада зиёда қилди.","Дарҳақиқат, улар сизлар ўйлаганингиздек, Аллоҳ бирон кишини қайта тирилтирмас, деб гумон қилардилар.","Биз самога тирмашдик. Лекин уни кучли қўриқчилар ва куйдириб юборадиган юлдузларга тўла кўрдик.","Дарҳақиқат, биз тинглаш қулай жойларга ўтириб олар эдик. Энди эса ким қулоқ солса, уни пойлаб турган куйдириб юборувчи юлдузга дуч келади.","Дарҳақиқат, биз ердаги кишиларга ёмонлик ирода қилинганми ёки Парвардигорлари уларга рушду ҳидоятни ирода қилганми, билмасмиз.","Дарҳақиқат, орамизда солиҳлар ҳам, бошқалар ҳам бор. Чунки биз турли йўлларда эдик.","Дарҳақиқат, биз билдикки, ер юзида ҳеч қачон Аллоҳни ожиз қолдира олмас эканмиз ва Ундан қочиб қутула олмас эканмиз.","Дарҳақиқат, биз ҳидоятни тинглагач, унга иймон келтирдик. Ким Парвардигорига иймон келтирса, савоби камайиб қолишидан ҳам, гуноҳи ортиб кетишидан ҳам қўрқмайди.","Албатта, орамизда мусулмонлар ҳам бор, йўлдан озганлар ҳам бор. Бас, ким мусулмон бўлса, бас, ана ўшалар тўғри йўлни танлабдилар.","Адашганлар эса жаҳаннамга ўтин бўлибдилар.","Улар тўғри йўлда барқарор турганларида эди, уларни мўл ёмғир ила суғорган бўлар эдик.","Уларни синаш учун. Ким Парвардигорининг зикридан юз ўгирса, У Зот уни қаттиқ азоб сари йўллаб қўяди.","Дарҳақиқат, масжидлар Аллоҳникидир. Бас, Аллоҳ билан бирга яна бирон кимсага дуо қилманглар.","Аллоҳнинг бандаси У Зотга дуо қилиб турган пайтида унинг устига ғуж-ғуж бўлиб ёпирилиб кетай дедилар.","Айтинг: «Мен ёлғиз Парвардигоримгагина дуо қилурман ва У Зотга бирон кимсани шерик қилмасман».","Айтинг: «Албатта, мен сизларга на бир зиён ва на бир фойда беришга молик эмасман».","Айтинг: «Албатта, мени Аллоҳдан ҳеч ким ҳимоя қила олмас ва Ундан ўзга паноҳ ҳам топа олмасман».","Аллоҳ тарафидан етказиш ва У Зотнинг рисолати бундан мустасно. Ким Аллоҳга ва У Зотнинг Пайғамбарига осийлик қилса, унга дўзах ўти бўлгай ва у ерда мангу қолурлар.","Ўзларига ваъда қилинган нарсани кўрганларида кимнинг мададкори заифроқ ва сони озроқ эканини билиб оладилар.","Айтинг: «Сизларга ваъда қилинган нарса яқинми ё унга Парвардигорим узоқ муддат тайин қилганми, билмайман».","У ғайбни Билувчидир ва ҳеч кимни Ўз ғайбидан огоҳ қилмас.","Ўзи рози бўлган пайғамбаргина бундан мустасно. Бас, Аллоҳ унинг олдидан ҳам, ортидан ҳам кузатувчи қўяди.","Токи билиб олсинки, улар Парвардигорларининг рисолатларини аниқ етказганлар. У Зот улардаги нарсаларни иҳота қилиб олган ва ҳамма нарсанинг саноғини ҳисоб-китоб қилиб қўйган.","Эй ўраниб олган зот.","Кечаси туриб намоз ўқинг. (Кечанинг озгинаси) бундан мустасно.","Унинг ярмида. Ёки ундан ҳам озроқ камайтиринг.","Ёки унга қўшинг. Ва Қуръонни тартил билан тиловат қилинг.","Дарҳақиқат, Биз устингизга оғир Сўзни ташлармиз.","Албатта, кечаси туриш муносиб палладир ва энг тўғри сўздир.","Кундузида эса сизнинг узоқ ишлашингиз бор.","Парвардигорингизнинг номини ёд этинг ва Унга бутунлай берилиб ибодат қилинг.","Машриқу мағрибнинг Парвардигори. Ундан ўзга илоҳ йўқ. Бас, уни ҳомий қилиб олинг!","Улар айтаётган гапларга сабр қилинг ва улардан чиройли тарзда четлашинг.","Аҳли неъмат бўлган ёлғонга чиқарувчиларни Менга қўйиб беринг ва уларга бирозгина фурсат беринг.","Дарҳақиқат, Бизнинг ҳузуримизда кишанлар ва дўзах бор.","Тиқилиб қоладиган таом ва аламли азоб бор.","Ўша кунда еру тоғлар ларзага келади ва тоғлар тўкилиб турадиган қумтепаларга айланади.","Дарҳақиқат, Фиръавнга бир пайғамбар юборганимиздек, сизларга ҳам қарши гувоҳлик берадиган бир пайғамбар юбордик.","Бас, Фиръавн пайғамбарга осийлик қилди ва Биз уни шиддатли азоб билан ушладик.","Куфр келтирадиган бўлсангизлар, болаларни чолларга айлантириб юборадиган кундан қандай ҳимояланасизлар?!","У кунда само ҳам ёрилгувчидир. У Зотнинг ваъдаси амалга ошгувчидир.","Дарҳақиқат, булар бир эслатмадир. Ким истаса, Парвардигори сари йўл олгай.","Дарҳақиқат, Парвардигорингиз сиз ва сиз билан бирга бўлган бир тоифа кечанинг учдан иккисидан озроғида, унинг ярмида ва учдан бирида қоим бўлаётганингизни билади. Кеча ва кундузни Аллоҳ белгилайди. У Зот (тунни тўла) саноғига етказа олмасликларингизни билиб, сизларга қайта енгиллик берди. Қуръондан муяссар бўлганича ўқийверинглар. У Зот сизларнинг орангизда беморлар бўлишини, бошқалар Аллоҳнинг фазлидан умид қилиб, ер юзида сафар қилишларини, яна бошқалар эса Аллоҳ йўлида жиҳод қилишларини билди. Бас, муяссар бўлганича ўқийверинглар. Намозни тўкис адо этинглар, закотни беринглар ва Аллоҳга қарзи ҳасана беринглар! Ўзларингиз учун нимани тақдим қилсангизлар, уни Аллоҳнинг ҳузурида топасизлар. У яхшироқ ва буюкроқ мукофот ҳолида бўлади. Аллоҳдан мағфират сўранглар! Албатта, Аллоҳ Мағфиратли, Меҳрибондир.","Эй, бурканиб ётган!","Туринг ва огоҳлантиринг!","Парвардигорингизни улуғланг!","Либосларингизни покланг!","Бутлардан йироқ бўлинг!","Кўп санаб, миннат қилманг.","Парвардигорингиз учун сабр қилинг.","Бурғу чалинганида.","Ана ўша кун қийин кундир!","Кофирларга осон бўлмаган (кундир)!","Мен якка ҳолида яратган кимсани Ўзимга қўйиб беринг.","Унга мўл-кўл мол-давлат бердим.","Ва ҳозиру нозир фарзандлар ҳам.","Унга осонлаштириб қўйдим.","Кейин у янада зиёда қилишимни тама қилур.","Асло! У Бизнинг оятларимизга қаршилик қилгувчи эди.","Яқинда Мен уни бир машаққатга дучор қиламан.","Дарҳақиқат, у ўйлади ва режа тузди.","Ҳалок қилингур, қандай режа тузди-я?!","Яна ҳалок қилингур, қандай режа тузди-я?!","Кейин назар солди.","Кейин афтини буриштирди ва қовоғини солди.","Кейин юз ўгирди ва мутакаббирлик қилди.","Деди: «Албатта, бу нақл қилинган сеҳрдан ўзга нарса эмас».","«Бу инсон сўзидан бошқа нарса эмас».","Яқинда уни Сақарга киритурман.","Сақарнинг нима эканини сиз қаердан ҳам билар эдингиз.","У на қолдиради ва на тарк этади.","У терини қаттиқ куйдирувчидир.","Унинг устида ўн тўққизта бор.","Дўзах эгалари - қўриқчиларини фақат фаришталар қилдик. Уларнинг сонини куфр келтирганлар учун синовдан ўзга нарса қилмадик. Токи китоб берилганлар аниқ билиб олсинлар ва иймон келтирганларнинг иймони янада зиёда бўлсин. Китоб берилганлар ҳам, мўминлар ҳам шубҳага бормасинлар. Қалбида марази бор кимсалар ва кофирлар эса: «Бу билан Аллоҳ нимани мисол қилмоқчи бўляпти», деб қолсинлар. Аллоҳ мана шундай Ўзи истаган одамни адаштиради ва Ўзи истаган одамни ҳидоят қилади. Парвардигорингизнинг лашкарларини Ўзидан ўзга ҳеч кимса билмас. У башарият учун бир эслатма, холос.","Йўқ! Ойга қасам.","Ўтиб кетган тунга қасам.","Ёришиб келаётган тонгга қасам.","Дарҳақиқат, у улканларнинг биридир.","У башарият учун огоҳлантирувчидир.","Сизлардан пешқадам бўлишни ёки ортда қолишни хоҳлаётган кимсалар учундир.","Ҳар бир жон ўзи қилиб ўтган ишнинг гаровидир.","Ўнг тараф соҳиблари бундан мустаснодир.","Улар жаннатларда бир-бирларидан сўрайдилар.","Жиноятчилар ҳақида.","\"Сизларни Сақарга нима киритди?\"","Дедилар: «Намоз ўқигувчилардан бўлмагандик.","Мискинга таом бермагандик.","Шўнғувчилар билан бирга шўнғир эдик.","Қиёмат кунини ёлғонга чиқарар эдик.","То бизга ўлим келгунига қадар (шундай эдик)».","Энди уларга оқловчиларнинг оқлови фойда бермас!","Уларга нима бўлдики, эслатмадан юз ўгирадилар?","Бамисоли улар ёввойи эшаклар.","Арслондан қочгани каби.","Балки улардан ҳар бир киши ўзига очиқ саҳифалар берилишини истаётгандир.","Йўқ! Балки улар охиратдан қўрқмаслар.","Йўқ! Албатта, у эслатмадир.","Бас, ким истаса, ундан эслатма-ибрат олур.","Аллоҳ хоҳлаганидагина эслатма-ибрат оладилар. У тақво аҳлидир, мағфират аҳлидир.","Қиёмат кунига қасам ичаман.","Маломатгўй нафсга қасам ичаман.","Инсон Бизни унинг суякларини ҳеч қачон тўплаёлмас, деб ўйлайдими?","Йўқ! Биз унинг бармоқ учларини ҳам асл ҳолига келтиришга Қодирмиз.","Балки, инсон олдинда фисқу фужур қилишни хоҳлар.","«Қиёмат куни қачон ўзи?» деб сўрар.","Кўз қамашганда.","Ой тутилганда.","Қуёш билан ой бирлаштирилганда.","Ўшал кунда инсон: «Қочар жой қаерда?» деб қолади.","Йўқ! Паноҳ йўқдир!","У кунда қарор топиш ёлғиз Парвардигорингизгадир.","У кунда инсонга қилиб ўтган ишлари ҳақида ҳам, қолдириб кетган ишлари ҳақида ҳам хабар берилади.","Балки инсон ўзига қарши ўзи гувоҳдир.","Гарчи узрларини тўкиб солса ҳам.","Уни шошилтириб, тилингизни у билан қимирлатманг.","Дарҳақиқат, уни жамлаб бериш ҳам, ўқитиб қўйиш ҳам Бизнинг зиммамизда.","Уни ўқиб берган пайтимизда ўқилишига қулоқ солиб туринг.","Кейин уни баён қилиб бериш ҳам Бизнинг зиммамизда.","Йўқ! Балки сизлар нақдни яхши кўрасизлар.","Охиратни эса тарк этасизлар.","У кунда яшнаб турадиган юзлар бор.","(Улар) Парвардигорларига боқиб тургувчидир!","У кунда тиришиб-буришган юзлар ҳам бор.","Ўзларига умуртқасини синдирадиган бир иш бўлишига ишониб турадилар.","Йўқ! Жон ҳалқумга келган пайтда.","«Дам солиб қўядиган бирон кимса борми?» - деб қолинганда.","Бунинг ажралиш эканини англаганида.","Оёқ оёққа чалмашиб қолганда.","Ана ўша кунда ҳайдалиш ёлғиз Парвардигорингиз саридир.","Бас, у на тасдиқ этди ва на намоз ўқиди!","Аксинча, ёлғонга чиқарди ва юз ўгирди.","Кейин гердайганича ўз аҳли сари кетди.","Ўлим бўлсин сенга, ўлим!","Кейин яна ўлим бўлсин сенга, ўлим!","Инсон, бекор ташлаб қўйиламан, деб ўйлайдими?","У тўкиладиган манийдан бир нутфа эмасмиди?","Сўнгра лахта қон бўлди. Кейин (Аллоҳ уни) яратди ва расо қилди.","Кейин ундан эркак ва аёл жуфтларни қилди.","Шундай Зот ўликларни тирилтиришга Қодир эмасми?!","Дарҳақиқат, инсонга у эсга олинадиган нарса бўлмаган бир замон келмадими?","Дарҳақиқат, Биз инсонни аралаш нутфадан яратдик. Уни синаймиз. (Шунинг учун) уни эшитадиган, кўрадиган қилиб қўйдик.","Дарҳақиқат, Биз унга йўл кўрсатдик. Ё шукр қилувчи ва ё куфр келтирувчи бўлсин.","Дарҳақиқат, Биз кофирлар учун занжирлар, кишанлар ва ёниб турган оловни тайёрлаб қўйганмиз.","Албатта, яхшилар аралашмаси кофур бўлган майкосалардан ичурлар.","Бир чашмаки, ундан Аллоҳнинг бандалари ичурлар. Уни ўзлари отилтириб чиқарадилар.","Улар назрга вафо қилурлар ва ёмонлиги кенг тарқаладиган кундан қўрқарлар.","Таомни ўзлари яхши кўриб турсалар-да, мискин, етим ва асирларни таомлантирурлар.","(Дерлар): «Албатта, биз сизларни фақат Аллоҳнинг розилиги учун овқатлантирамиз. Бунинг эвазига сизлардан мукофот ёки ташаккур истамасмиз.","Дарҳақиқат, биз Парвардигоримиз томонидан бўладиган юзларни қаттиқ тириштириб-буриштириб юборадиган кундан қўрқамиз».","Бас, Аллоҳ уларни ўша куннинг ёмонлигидан сақлади ҳамда уларга нур ва сурур бахш этди.","Сабр қилганлари учун уларни жаннат ва ипак билан мукофотлади.","У ерда сўриларда ястанган ҳолдалар. У ерда қуёшни ҳам, совуқни ҳам кўрмаслар.","Жаннат соялари уларга яқиндир. Мевалари ҳам эгиб қўйилгандир.","Уларга кумуш идишлар ва биллур қадаҳлар айлантириб турилур.","Кумушдан бўлган биллурлар. Уни ўлчаб қўйгандирлар.","У ерда аралашмаси занжабил бўлган қадаҳдан суғорилурлар.","Салсабил деб аталадиган чашмадан.","Уларнинг атрофида мангу ёш болалар айланиб юрадилар. Уларни кўрсангиз, сочилган маржон, деб ўйлайсиз.","Назар ташласангиз, у ерда неъматни ва катта мулк-давлатни кўрасиз.","Уларнинг устларида яшил ипак ва шойи либослар бўлиб, улар кумуш билагузуклар билан безангандирлар ва Парвардигорлари уларни ниҳоятда покиза шароб ила суғоргандир.","Албатта, бу сизларга мукофот бўлди ва ҳаракатингиз қабул бўлди.","Дарҳақиқат, Биз сизга Қуръонни бўлиб-бўлиб нозил қилдик.","Бас, Парвардигорингиз ҳукмига сабр қилинг ва улардан бирон осий ё нонкўрга итоат этманг!","Ва эрта-ю кеч Парвардигорингиз номини зикр қилинг!","Кечанинг бир қисмида ҳам У Зотга сажда қилинг ва тунда Унга узоқ тасбеҳ айтинг!","Дарҳақиқат, анавилар нақдни хуш кўрмоқдалар. Оғир кунни эса ортларига отмоқдалар.","Биз уларни яратдик ва яратилишини мустаҳкам қилдик. Агар истасак, уларни ўзларига ўхшаганларга алмаштириб қўяверамиз.","Дарҳақиқат, бу бир эслатмадир. Ким хоҳласа, Парвардигори сари йўл олади.","Аллоҳ хоҳлаганидагина сизлар ҳам хоҳларсизлар. Албатта, Аллоҳ Билувчи ва Ҳаким Зотдир.","Ўзи хоҳлаган одамни Ўз раҳматига киритади. Золимларга эса аламли азобни тайёрлаб қўйган.","Пайдар-пай юборилган (шамол)ларга қасам.","Қаттиқ эсган шамолларга қасам.","Тарқатиб юборадиган (шамол)ларга қасам.","Фарқлаб берувчи (фаришта)ларга қасам.","Ваҳийни ташувчиларга қасам.","Узрларни ёки огоҳлантиришларни.","Сизларга ваъда қилинган нарса аниқ содир бўлгувчидир.","Бас, юлдузлар ўчирилганда.","Ва осмон ёрилганда.","Тоғлар сочилганда.","Пайғамбарларга вақт белгиланганда.","Қай кунга белгиланган эди?","Ажратиш кунига.","Ажратиш куни нима эканини қаердан ҳам билар эдингиз?","У кунда ёлғон дегувчиларга ҳалокат бўлгай!","Олдингиларни ҳалок қилмадикми?","Сўнгра кейингиларни ҳам уларга эргаштирурмиз.","Жиноятчиларни шундоқ қилурмиз.","У кунда ёлғон дегувчиларга ҳалокат бўлгай!","Сизларни бир ҳақир сувдан яратмадикми?","Бас, уни мустаҳкам қароргоҳга жойламадикми?!","Маълум муддатгача.","Бас, қодир бўлдик. Нақадар қудратлимиз!","У кунда ёлғон дегувчиларга ҳалокат бўлгай!","Ерни ўзига тортувчи қилиб қўймадикми?!","Тирикларни ҳам, ўликларни ҳам.","Унда юксак тоғлар қилдик ва сизларни чучук сув билан суғордик.","У кунда ёлғон дегувчиларга ҳалокат бўлгай!","Энди ўша ўзингиз ёлғонга чиқарган нарса сари юраверинглар.","Уч бўлакли «соя» сари бораверинглар!","У ҳеч қандай салқин ҳам қилмайди, оловни ҳам қайтармайди.","Албатта, у қасрдек учқунларни отиб туради.","Гўё улар қорамтир сариқ туялардек.","У кунда ёлғон дегувчиларга ҳалокат бўлгай!","Бу улар гапира олмайдиган кундир.","Ва уларга узр айтишга изн берилмайди.","У кунда ёлғон дегувчиларга ҳалокат бўлгай!","Бу ажратиш кунидир. Сизларни ҳам, олдингиларни ҳам жамладик.","Бас, сизларнинг бирон ҳийлангиз бўлса, Менга ишлатиб кўринглар-чи?","У кунда ёлғон дегувчиларга ҳалокат бўлгай!","Дарҳақиқат, тақводорлар соялар ва чашмаларда бўладилар.","Ва кўнгиллари тусаган мевалардадирлар.","Қилиб ўтган яхши амалларингиз учун енглар, ичинглар. Ош бўлсин.","Албатта, Биз гўзал амал қилгувчиларни мана шундай мукофотлаймиз.","У кунда ёлғон дегувчиларга ҳалокат бўлгай!","Бирозгина еб, фойдаланиб қолинглар! Сизлар аниқ жиноятчисизлар!","У кунда ёлғон дегувчиларга ҳалокат бўлгай!","Уларга: «Рукуъ қилинглар», дейилса, рукуъ қилмаслар.","У кунда ёлғон дегувчиларга ҳалокат бўлгай!","Бас, ундан кейин қайси сўзга ишонадилар?!"]