["Бир-бирларидан нима ҳақида сўрамоқдалар?!","Улуғ хабар ҳақида.","Шундай хабарки, улар унинг ҳақида ихтилофдадирлар.","Йўқ! Улар яқинда билиб олурлар.","Яна бир бор йўқ! Улар яқинда билиб олурлар!","Ерни (сизлар учун) бешик қилиб қўймадикми?","Ва тоғларни қозиқ (қилиб қўймадикми?).","Ва сизларни жуфт-жуфт қилиб яратдик.","Ва уйқуларингизни ором қилиб бердик.","Кечани либос қилдик.","Кундузни эса тирикчилик вақти қилдик.","Устингнизда етти қават мустаҳкам (осмон)ни бино қилдик.","Ва чарақлаб турувчи чироқ ҳам қилдик.","Яна Биз ўзидан ёмғирни сиқиб чиқаргувчи (булут)лардан мўл-кўл сув-ёмғир ёғдирдик.","У билан дон ва наботот чиқаришимиз учун (шундай қилдик).","Ва дарахтлари бир-бирига чирмашиб кетган боғларни чиқариш (барпо қилиш учун шундай қилдик).","Албатта, ажрим куни аниқ белгилаб қўйилди.","У кунда Сурга пуфланур ва сизлар тўп-тўп бўлиб келурсизлар.","Само очилиб, (фаришталар тушиб келадиган) эшикларга айланиб қолди!","Тоғлар ўрнидан қўзғатилиб, саробга айланур.","Албатта, жаҳаннам пойлаб турувчидир.","Ҳаддидан ошганларнинг борар жойи.","У ерда узоқ замонлар қолиб кетадилар.","У ерда бирон салқинни ҳам, ичимликни ҳам топмаслар.","Фақат қайноқ сув ва йирингнигина (тотурлар)!","(Бу уларнинг қилмишларига) яраша жазо!","Чунки улар ҳисоб-китобдан қўрқмас эдилар.","Ва оятларимизни батамом ёлғон дер эдилар!","Биз ҳаммасини ёзиб, китоб қилиб қўйганмиз.","Бас, татиб кўринглар, энди сизларга азобдан бошқа ҳеч нарсани зиёда қилмасмиз.","Албатта, тақводорлар учун нажот манзили бордир.","Боғлар ва узумзорлар.","Бўйи етган тенгдош қизлар.","Тўлдирилган қадаҳлар.","У ерда беҳуда ва ёлғон гапларни эшитмаслар.","Парвардигорингиз тарафидан бир мукофот, совға ҳисобида.","Осмонлар ва ернинг ҳамда уларнинг ўртасидаги бор нарсаларнинг Парвардигори бўлмиш Меҳрибон Зот (томонидан). Улар У Зотдан (қўрқиб) бирон сўз айта олмаслар.","Ўша кунда Руҳ ва фаришталар саф бўлиб турар. Раҳмон изн берганларгина гапира олур ва рост сўзлар.","Бу ҳақ кундир. Бас, ким хоҳласа, ўз Парвардигори томон қайтадиган йўлни тутгай.","Албатта, Биз сизларни яқин келажакда содир бўладиган азобдан огоҳлантирдик. У кунда ҳар киши ўзи қилган ишни кўради. Ва кофир: «Кошки тупроқ бўлиб кетсам эди», деб қолади.","Шиддат билан (жонни) суғуриб олувчи (фаришта)ларга қасам.","Юмшоқлик билан жон олувчи (фаришта)ларга қасам.","Сузиб юрувчи (фаришта)ларга қасам.","Ўзишда мусобақа қилувчи (фаришта)ларга қасам.","Ишнинг тадбирини қилувчи (фаришта)ларга қасам.","Титрагувчи титраган кунда.","Унга эргашувчи эргашганда.","Ўша кунда қалблар қўрқувга тушгувчидир.","Кўзлари эса эгилиб қолгувчидир!","Дейдилар: «Биз ростдан ҳам ортга қайтариламизми?»","«Чириган суяк бўлганимиздан кейин ҳам-а?»","«Ундай бўлса, бу зиёнли қайтиш-ку!» – дерлар.","Албатта, у бир қичқириқдан бошқа нарса эмас.","Қарабсизки, улар ер устида бўлиб қолурлар!","Сизга Мусонинг хабари келдими?","Эсланг, Парвардигори унга муқаддас Туво водийсида (шундай) нидо қилган эди:","«Фиръавннинг ёнига бор, чунки у ҳаддидан ошди.","Унга: «Сенда покланишга (рағбат) борми?","Сени Парвардигоринг сари бошласам, бас, (У зотдан) қўрқсанг», деб айт».","Унга бир улкан мўъжиза кўрсатди.","(Фиръавн) уни ёлғонга чиқарди ва осий бўлди.","Сўнг юз ўгириб, тезлаб кетди.","Сўнг (ўз одамларини) тўплаб, жар солди:","«Мен сизларнинг энг олий Парвардигорингиздирман», деди.","Бас, Аллоҳ уни охират ва дунё азобига гирифтор қилди.","Албатта, бунда У зотдан қўрқадиганлар учун ибрат бордир.","Сизларни яратиш қийинми ёки осмонними? Уни (Аллоҳ) бино қилди.","Шифтини баланд қилиб, тиклади.","Кечасини қоронғу қилиб, (ундан) кундузини чиқарди.","Ундан кейин ерни ёйиб текис қилди.","Ундан сувини, ўтлоқларини чиқарди.","Ва тоғларни ўрнаштирди.","Сизларга ва чорваларингизга фойдали бўлиши учун.","Катта бало келганида.","Инсон ўз қилмишини ёдга олган кунда.","Ва дўзах кўрадиган кимсага кўрсатиб қўйилганида.","Ўшанда ким ҳаддидан ошган бўлса.","Ва бу дунё ҳаётини устун қўйган бўлса.","Унинг жойи фақат жаҳаннам бўлур.","Ким Парвардигори қошида туришдан қўрқиб, нафсни хоҳиш-истаклардан тийган бўлса.","Бас, унинг жойи жаннатдир.","Сиздан, Қиёмат қачон бўлиши ҳақида сўрайдилар.","Сиз қаёқда-ю, уни зикр қилиш қаёқда?!","Уни (билиш) ёлғиз Парвардигорингизга бориб тўхтар.","Сиз фақат ундан қўрқадиган кишиларни огоҳлантиргувчисиз, холос.","Уни кўрадиган кунда худди (бу дунёда) биргина Пешиндан сўнг ёки чошгоҳ пайтида тургандек бўлиб қолурлар!","Афтини буриштирди ва юз ўгирди.","Ҳузурига кўр киши келганда.","Қаердан биласиз? Эҳтимол у покланар?","Ёки насиҳат олар ва насиҳат унга кор қилар?","Аммо истиғно қилган кимсага эса.","Сиз ўша томонга юзланяпсиз.","У покланмаса, сизга зарари бўлмас.","Аммо ҳузурингизга шошилиб келган.","(Аллоҳдан) қўрққан ҳолида.","Бас, сиз ундан юз ўгиряпсиз.","Йўқ! Албатта, улар (Қуръон оятлари) эслатмадир.","Бас, хоҳлаган киши ундан ибратланур.","(Бу Қуръон) азизу мукаррам саҳифалардадир.","Қадри баланд, покиза.","Элчи (фаришта)лар қўлларидадир.","Итоатли, улуғдирлар.","Ҳалок бўлгур инсон-а! Бунчалар кофир бўлмаса!","Уни қайси нарсадан яратди ўзи?!","Уни бир нутфадан яратиб, тақдирини белгилаб қўйди.","Кейин йўлини осон қилди.","Кейин уни ўлдириб, қабрга киритди.","Кейин истаган пайтида уни қайта тирилтиради.","Йўқ, ундоқ эмас! У (Аллоҳ) буюрган буйруқни бажармади.","Инсон ўзининг таомига назар солсин.","Биз сув-ёмғирни қуйдирдик.","Сўнг ерни ёрдик.","Кейин унда дон-дунни ундириб-ўстириб қўйдик-ку!","Узум ва яшил емларни.","Зайтун ва хурмоларни.","Қуюқ дарахтзор боғларни.","Мева-чева-ю, ўт-ўланларни.","Сизларга ва чорваларингизга фойдали бўлсин, деб.","Қачон кар қилувчи овоз келса,","У кунда киши ўз ака-укасидан,","Ота-онасидан,","Хотин, бола-чақасидан қочади.","У кунда ҳар бир кишининг ўзига етарли ташвиши бўлади.","У кунда порлоқ чеҳралар бор.","Кулгувчи ва хуррам.","У кунда яна шундай чеҳралар борки, уларни ғубор босган.","У (юз)ларни қаролик қоплаб олур!","Ана ўшалар фожир кофирлардир.","Қуёш ўралиб қолганида;","Юлдузлар тўкилганида;","Тоғлар жойидан қўзғатилганида;","Ҳомиласига ўн ой тўлган бўғоз туялар қаровсиз қолганида;","Ваҳший ҳайвонлар бир жойга тўпланганида;","Денгизлар аланга олиб ёнганида;","Жонлар жуфтланганида;","Тириклай кўмилган қиздан сўралганида;","Қандай гуноҳ сабабли ўлдирилгани ҳақида;","Саҳифалар очилганида;","Осмон сидириб олинганида;","Жаҳаннам қиздирилганида;","Жаннат яқинлаштирилганида;","Ҳар бир жон нима ҳозирлаб келганини биладир.","Кўздан ғойиб бўлгувчи юлдузларга қасам ичаман.","Юрувчи, беркинувчиларга.","Келиб-кетаётган кечага.","Ва отаётган тонгга (қасам ичурманки).","У шак-шубҳасиз, улуғ элчининг (Аллоҳдан келтирган) сўзидир!","У қувватли, Аршнинг соҳиби наздида мартабаси олий.","Итоат этилгувчи ва ишончлидир.","Сизнинг соҳибингиз мажнун эмасдир.","Дарҳақиқат, у (Жаброил алайҳиссалом)ни очиқ уфқда кўрди.","Ва у ғайбга бахил эмасдир.","У (Қуръони Карим) тошбўрон қилинган шайтоннинг сўзи эмасдир.","Бас, қаён бормоқдасиз?!","У бутун оламлар учун бир эслатмадан бошқа нарса эмас.","Орангиздаги тўғри йўлдан бормоқни истаганлар учун.","Бутун оламлар Парвардигори Аллоҳ хоҳласагина хоҳларсизлар.","Осмон ёрилганида.","Юлдузлар сочилиб кетганида.","Денгизлар очилганида.","Қабрлар тўнкариб қўйилганида.","Ҳар бир жон қилган ишини ҳам, кечиктириб қилолмай қолган ишини ҳам билади.","Эй инсон, улуғ Парвардигоринг борасида сени нима алдаб қўйди?!","(Парвардигорингки), сени яратди, тиклади, расо қилди.","Ўзи хоҳлаган сувратда сени таркиб топтирди.","Асло! Балки, сиз жазони ёлғонга чиқармоқдасиз!","Ҳолбуки, сизнинг устингиздан кузатиб турувчилар бордир.","Улуғ котиблар.","Нима қилаётганингизни биладилар.","Албатта, яхшилар неъмат ичрадирлар.","Фожирлар эса жаҳаннам ичрадирлар.","У ерга Қиёмат куни кирадилар.","Ва ундан ғойиб бўла олмаслар.","Сиз жазо куни нима эканини қаердан ҳам билардингиз?!","Кейин (такрор айтаман) сиз жазо куни нима эканини қаердан ҳам билардингиз?!","У кунда ҳеч ким ҳеч кимга ҳеч нарса қилиб бера олмас. У кунда ҳамма иш ёлғиз Аллоҳнинг Қўлидадир.","Уриб қолгувчиларга ҳалокат бўлсин!","Улар одамлардан нарса ўлчаб олсалар, тўла оладилар.","Уларга ўлчаб ёки тортиб берганларида эса кам қилиб берадилар.","Улар ўзларининг қайта тирилишларини ўйламайдиларми?!","Улуғ бир кунда.","Барча одамлар бутун оламлар Парвардигори ҳузурида тик турадиган кунда.","Йўқ! Албатта, фожирларларнинг китоби Сижжийндадир.","Сижжийн нима эканини сиз қаердан ҳам билардингиз?","(У) битилган китобдир.","У кунда ёлғонга чиқарувчиларга ҳалокат бўлгай!","Улар жазо кунини ёлғонга чиқарадилар.","Уни ҳар бир ҳаддан ошган ва гуноҳга ботган кимсагина ёлғон дер!","Оятларимиз унга тиловат қилинса, аввалгиларнинг афсоналари, дер.","Йўқ! Уларнинг қилган касблари қалбларига моғор бўлиб ўрнашиб қолгандир.","Йўқ! Албатта, улар ўша кунда Парвардигорларидан тўсилгувчидирлар!","Сўнгра, албатта, улар дўзахга киргувчидирлар.","Сўнгра, сизлар ёлғонга чиқариб юрган нарса мана шудир, дейилади.","Асло! Яхшиларнинг номаи аъмоллари, шак-шубҳасиз, Иллийюндадир.","Иллийюн нималигини қаердан ҳам билардингиз!","(У) битилган китобдир.","Унга муқарраб (фаришта)лар гувоҳ бўлурлар.","Албатта, яхшилар неъматдадирлар.","Сўриларда қараб (ўтирадилар).","Чеҳраларида неъмат жилвасини кўрасиз.","Улар муҳрланган шаробдан ичурлар.","Унинг муҳри мушк бўлур. Бас, беллашадиганлар мана шу ишда беллашсинлар.","Унинг аралашмаси таснимдандир.","У бир чашмадирки, ундан муқарраблар ичадилар.","Албатта, жиноят қилганлар иймон келтирганлар устидан кулар эдилар.","Уларнинг ёнидан ўтиб қолсалар, масхаралаб имо-ишоралар қилардилар.","Қачон уйларига қайтсалар, ҳузурланиб қайтардилар.","Уларни кўрганларида, анавилар ҳақиқий адашганлардир, дер эдилар.","Ҳолбуки, улар (мўминларнинг) устига қўриқчи қилиб юборилган эмасдилар.","Энди бу кунда иймон келтирганлар кофирлар устидан куладилар.","Сўриларда қараб (ўтирадилар).","Кофирлар ўзлари қилиб ўтган қилмишларининг жазосини олдиларми?","Осмон ёрилганида;","Ҳамда у Парвардигорига қулоқ тутганида ва (шу ишга) лойиқ топилганида;","Ер ёйилганида;","Ва ўзидаги нарсаларни чиқариб ташлаб, холи бўлиб қолганида;","Ҳамда у Парвардигорига қулоқ тутганида ва (шу ишга) лойиқ топилганида;","Эй инсон, албатта, сен меҳнат-машаққат чекиб Парвардигорингга боргувчисан ва У Зотга йўлиққувчисан.","Бас, кимнинг номаи аъмоли ўнг томонидан берилса.","Тезда, осонгина ҳисоб қилинур.","Ва аҳли ҳузурига хурсанд ҳолда қайтиб борур.","Энди кимнинг номаи аъмоли орқа томонидан берилса,","Бас, у ўлимини чақириб қолур.","Ва дўзахга кирур.","Ҳа, у (бу дунёда) аҳли оиласида шоду хуррам эди.","У ўзининг (Охиратга) ҳеч қачон қайтмаслигига ишонарди.","Асло! Парвардигори уни шубҳасиз кўриб тургувчи эди.","Шафаққа қасамки,","Кеча ва у қамраб олган нарсаларга қасамки,","Ва тўлин ойга қасамки,","Албатта, сизлар босқичдан босқичга борасизлар.","Уларга нима бўлганки, иймон келтирмайдилар?!","Уларга Қуръон ўқилса, сажда қилмайдилар.","Балки куфр келтирганлар ёлғонга чиқарурлар.","Аллоҳ эса улар ичларига солиб яшираётган нарсаларини жуда яхши билгувчидир!","Бас, сиз уларга аламли азоб ҳақида «хушхабар» беринг!","Иймон келтирганлар ва яхши амалларни қилганлар бундан мустасно. Уларга битмас-туганмас ажру савоблар бордир.","Буржларни ўз ичига олган осмонга қасам;","Ваъда қилинган кунга қасам;","Гувоҳ бўлувчи ва гувоҳ бўлинувчига қасам;","Чоҳ эгаларига лаънат бўлсин!","У ёқилғиси бор оловдир.","Ўзлари эса унинг атрофида ўтирибдилар.","Мўминларга нисбатан қилаётган ишларига ўзлари гувоҳдирлар.","Улар мўминлардан Азиз (Қудратли, Енгилмас) ва Ҳамид (Мақтовга лойиқ) Аллоҳга иймон келтирганлари учунгина ўч олдилар.","У шундай Зотки, осмонлару ернинг мулки Уникидир. Аллоҳ ҳар бир нарсага Гувоҳдир.","Албатта, мўмин ва мўминаларни фитнага солиб, кейин тавба қилмаганларга жаҳаннам азоби ва куйдирувчи азоб бордир.","Албатта, иймон келтирган ва яхши амаллар қилган зотлар учун остидан дарёлар оқиб турадиган жаннатлар бордир. Мана шу катта бахтдир.","Албатта, Парвардигорингизнинг ушлаши қаттиқдир.","Албатта, Унинг Ўзи бошлайди ва қайтаради.","У мағфират қилувчи, яхшиликни раво кўрувчи Зотдир.","У Арш соҳибидир. Буюкдир.","Хоҳлаган ишини қилгувчидир.","Сизга қўшинларнинг хабари келдими?","Фиръавн ва Самуднинг.","Асло! Куфр келтирганлар ёлғонга чиқаришдадирлар.","Ҳолбуки, Аллоҳ уларнинг ортидан иҳота қилиб турувчидир.","(Қуръон Карим) асло (шеър эмас)! У буюк Қуръондир.","(У) Лавҳул Маҳфуздадир.","Осмонга қасам, тунги йўловчига қасам.","Тунги йўловчи нима эканини қаердан ҳам билар эдингиз.","У пориллаб турувчи юлдуздир.","Ҳар бир жоннинг устида ёд олгувчи бордир.","Энди инсон ўзининг нимадан яралганига бир боқсин!","У отилиб чиқувчи бир сувдан яралган-ку!","У орқа умуртқа ва кўкрак суяги орасидан чиқади.","Албатта, У Зот уни қайта тирилтиришга Қодирдир.","Сирлар фош бўладиган кунда.","Бас, унинг учун бирон куч ҳам, ёрдамчи ҳам бўлмас!","Қайта-қайта тушгувчи (ёмғир)нинг эгаси бўлмиш осмонга қасам;","Ёриб чиқувчининг эгаси бўлган ерга қасам.","Албатта, у ажратувчи сўздир.","У ҳазил эмасдир.","Албатта, улар ҳийла қиладилар.","Мен ҳам бир ҳийла қилурман.","Бас, кофирларга муҳлат беринг. Ҳа, уларга озгина муҳлат беринг.","Энг олий зот бўлмиш Парвардигорингизнинг номини покланг!","У яратган ва расо қилиб қўйган Зотдир.","У белгилаб, ҳидоят қилиб қўйган Зотдир.","У ўт-ўланни ундириб чиқариб,","Сўнг уни қорамтир хас-хашак қилиб қўйган Зотдир.","Биз сизни қироат қилдирурмиз. Бас, сиз унутмассиз.","Аллоҳ хоҳлагани бундан мустасно. Албатта, У Зот ошкора ишларни ҳам, хуфёналарини ҳам билур.","Биз сизни осонликка муваффақ қилурмиз.","Эслатиш фойда берса, эслатинг!","(Аллоҳдан) қўрқадиган киши эслатмага қулоқ солади.","Бадбахт кимса эса ўзини ундан четга олур.","Катта оловга кирадиган (бадбахт).","Сўнгра у жойда на ўла олур ва на яшай олур!","Дарҳақиқат, пок бўлган киши нажот топгай.","Парвардигорининг номини ёд этиб намоз ўқиган (киши).","Йўқ! Сизлар шу дунё ҳаётини устун қўйяпсизлар!","Ҳолбуки, охират яхшироқ ва боқийроқдир.","Албатта, (Сизга эслатилган) бу (нарсалар) аввалги саҳифаларда бордир.","Иброҳим ва Мусо саҳифаларида.","Сизга ўраб олгувчи ҳақида хабар келдими?","У кунда эгилиб қолган юзлар бўлур.","Меҳнат-машаққатдан ҳорғин.","(Бу юзлар) қизиган дўзахга кирур!","Қайнаб турган булоқдан суғорилур!","Уларга тикандан бошқа таом бўлмас.","У семиртирмайди ҳам, очлиқдан халос ҳам қилмайди!","У кунда хурсанд чеҳралар ҳам бўлур.","Ўз ишидан рози.","Олий жаннатдадирлар.","У жойда бирон беҳуда сўз эшитмаслар.","У жойда оқар булоқ бордир.","У жойда баланд сўрилар.","Тайёрлаб қўйилган қадаҳлар бор.","Тизиб қўйилган ёстиқлар.","Ҳамма ёққа тўшалган гиламлар бордир.","Ахир улар туянинг қандай яратилганига боқмайдиларми?","Осмоннинг қандай кўтариб қўйилганига?","Тоғларнинг қандай ўрнатилганига?","Ернинг қандай ёйиб-текислаб қўйилганига?","Бас, эслатинг! Сиз эслатувчидирсиз, холос.","Сиз уларнинг устида зўравонлик билан ҳукм юргизгувчи эмассиз.","Юз ўгирган ва кофир бўлган кимса бундан мустасно.","Уни Аллоҳ энг катта азоб билан азоблар!","Албатта, уларнинг қайтиши Бизгадир.","Сўнгра уларни ҳисоб-китоб қилиш ҳам ёлғиз Бизнинг зиммамиздадир!","Тонгга қасам.","Ўн кечага қасам.","Жуфт ва тоққа қасам.","Ўтиб бораётган кечага қасам.","Мана шу (айтиб ўтилган нарса)ларда ақл эгалари(ни қониқтирадиган) қасам борми?!","Парвардигорингиз Одни қандай қилганини кўрмадингизми?","Баланд устунлари бор Иромни.","Юртларда уларнинг ўхшаши яратилмаган эди.","Водийда харсанг тошларни кесган Самудни.","Ва кўп аскарлари бор Фиръавнни.","Юртларда ҳадларидан ошган.","У жойларда фасодни кўпайтириб юборгандилар.","Бас, Парвардигорингиз уларнинг устига турли азоб-офатни ёғдирди!","Шак-шубҳасиз, Парвардигорингиз кузатиб тургувчидир.","Энди қачон инсонни Парвардигори синаш учун азиз-мукаррам қилиб қўйса ва унга неъмат ато этса, Парвардигорим мени азиз қилди, дейди.","Қачон уни синаш учун ризқини танг килиб қўйса, Парвардигорим мени хор қилди, дейди.","Асло! Сизлар етимни иззат-икром қилмайсизлар!","Бир-бирингизни мискинларга таом беришга ундамайсизлар.","Меросни эса шиддат ила еяверасизлар.","Мол-дунёни ўта яхши кўрасизлар.","Асло! Замин парча-парча қилиб юборилганда;","Парвардигорингиз ва фаришталар саф-саф бўлиб келганда;","Ўша кунда жаҳаннам келтирилганда. Ўша кунда инсон эслайдир. Лекин бу эслашдан энди не фойда?","«Шу ҳаётим учун ҳам бирон нарса тақдим қилиб қўйганимда эди», деб қолади.","Ўша кунда Аллоҳнинг азобига ўхшаш азоб билан ҳеч ким азоблай олмайди.","У Зотнинг боғлаши каби ҳеч ким боғлай олмас!","Эй, хотиржам жон!","Парвардигорингга рози бўлган ва рози қилинган ҳолда қайт!","Бас, бандаларим қаторига киргин.","Ва жаннатимга киргин!","Мана шу шаҳарга қасам.","Сиз яшаб турган мана шу шаҳарга.","Ота ва ундан тарқаган болаларга қасам.","Дарҳақиқат, Биз инсонни меҳнат-машаққатга яратдик.","У ўзига ҳеч кимнинг кучи етмайди, деб ўйлайдими?!","Жуда кўп мол-дунёни сарфлаб юбордим, дейди.","Уни ҳеч ким кўрмаган, деб ўйлайдими?","Биз унга икки кўзни.","Бир тил ва икки лабни бермадикми?","Ва уни икки йўлга йўллаб қўймадикми?","Бас, у довонни ошиб ўтмади.","Довон нималигини сиз қаёқдан билардингиз?","У бир қул озод қилишдир.","Ёки очарчилик кунида таом беришдир.","Бирон қариндош етимга.","Ё муҳтож бечора-мискинга.","Сўнгра, иймон келтирганлар ва бир-бирини сабрга, меҳр-шафқатга чақирганлар бўлса,","Ана ўшалар ўнг томон эгаларидир.","Оятларимизга куфр келтирганлар чап томон эгаларидир.","Уларнинг устида қопланиб қолгувчи олов бўлур!","Қуёш ва унинг ёғдусига қасам.","Унинг ортидан келган ойга қасам.","Уни равшан қилиб кўрсатган кундузга қасам.","Уни ўраб-яширган кечага қасам.","Осмонга ва уни бино қилган Зотга қасам.","Ерга ва уни тўшаб қўйган Зотга қасам.","Жонга ва уни расо қилиб яратган Зотга қасам.","Кейин унга фисқ-фужурини ҳам, тақвосини ҳам илҳом қилиб қўйган Зотга қасам.","Дарҳақиқат, уни поклаган киши нажот топди.","Уни кўмиб хорлаган кимса эса ноумид бўлди.","Самуд ҳаддидан ошиб (пайғамбарлари Солиҳ алайҳиссаломни) ёлғонга чиқарди.","Эсланг, уларнинг энг бадбахти қўзғалганида,","Аллоҳнинг пайғамбари уларга деди: «Аллоҳнинг туясидан ва уни суғоришдан тийилинглар!»","Бас, уни ёлғончи қилишиб, туяни сўйиб юбордилар. Шундан кейин Парвардигорлари гуноҳлари туфайли уларнинг устига қирғин юбориб, уни (барчаларига) баробар қилди.","У Зот ишнинг оқибатидан қўрқмас.","Ўраб-яширган кечага қасам;","Ёришиб келган кундузга қасам;","Эркак ва аёлнинг яратилишига қасам.","Албатта, сизларнинг ҳаракатларингиз хилма-хилдир.","Энди ким саховат кўрсатса ва тақво қилса;","Ҳамда гўзал оқибатни тасдиқ этса;","Бас, Биз уни осон йўлга муяссар қилурмиз.","Энди ким бахиллик қилса ва ўзини беҳожат билса;","Ҳамда гўзал оқибатни ёлғон деса;","Бас, уни оғир йўлга «муяссар» қилурмиз!","У қулаган вақтида унга мол-мулки фойда бермас.","Албатта, ҳидоятга бошлаш Бизнинг зиммамиздадир.","Шак-шубҳасиз, охират ҳам, дунё ҳам ёлғиз Бизникидир.","Бас, Мен сизларни ловуллаган ўтдан огоҳлантирдим.","Унга бадбахтдан бошқаси кирмас.","Ёлғон деган ва юз ўгирган (бадбахт).","Тақводор банда эса ундан четлатилур.","Бойлигини сарфлаган ва ўзини поклаган (тақводор).","Унинг бўйнида қайтарилиши керак бўлган бирон кишининг ҳақи йўқ эди.","У энг олий Парвардигорининг Юзини истабгина (саховат кўрсатганди).","У яқинда рози бўлади.","Чошгоҳга қасам.","Қоплаб-ўраб олган кечага қасам.","Парвардигорингиз сизни тарк ҳам этмади, ёмон кўриб ҳам қолмади.","Албатта, охират сиз учун дунёдан яхшироқдир.","Яқинда Парвардигорингиз сизга ато этгай ва сиз рози бўлурсиз.","Сизни етим ҳолда топиб, бошпана бермадими?","Сизни ҳайрон ҳолда топиб, ҳидоятга бошламадими?","Сизни камбағал ҳолда топиб, бой қилмадими?","Бас, энди сиз ҳам етимга қаҳр қилманг!","Гадони ҳайдаманг!","Парвардигорингизнинг неъмати ҳақида сўзланг!","Бағрингизни кенг қилиб қўймадикми?","Сиздан юкингизни олмадикми?","Елкангизни босиб турган (юк)ни.","Зикрингизни юқори кўтармадикми?","Бас, албатта, бир қийинчилик билан бир осонлик бордир.","Албатта, бир қийинчилик билан бир осонлик бордир.","Фориғ бўлсангиз, (ибодатга) қаттиқ берилинг!","Ва ёлғиз Парвардигорингизга юзингизни буринг!","Анжирга қасам, зайтунга қасам;","Сийно тоғига қасам;","Мана шу тинч-осойишта шаҳарга қасам.","Дарҳақиқат, Биз инсонни энг гўзал шаклда яратдик.","Сўнгра уни асфала-софилинга қайтардик.","Иймон келтириб, солиҳ амалларни қилган зотлар бундан мустасно. Улар учун битмас-туганмас ажр бордир.","Бас, сени охиратни ёлғон дейишга нима мажбур қилур?!","Ахир Аллоҳ ҳукм қилгувчиларнинг энг адолатлиси эмасми?!","Яратган Парвардигорингиз номи билан ўқинг.","У инсонни лахта қондан яратган.","Ўқинг! Парвардигорингиз энг карамли Зотдир.","У қалам билан ўргатган.","Инсонга билмаган нарсаларини ўргатди.","Асло! Инсон ҳаддидан ошар.","Ўзини бой кўрган пайтида.","Албатта, қайтиб бориш Парвардигорингизгадир.","Тўсаётган кимсани кўрдингизми?!","Бандани намоз ўқиётганида?!","Айтинг-чи, агар ўша (одам) ҳидоятда бўлса.","Ёки тақвога буюрса.","Айтинг-чи, агар у ёлғонга чиқарса ва юз ўгирса.","Аллоҳ уни кўриб туришини билмасми?","Асло! Агар қайтмаса, пешонасидан шиддат-ла тутамиз!","Ёлғончи, хатокор пешонасидан!","Бас, у ўзининг тўдасини чақираверсин!","Биз ҳам забонияларни (азоб фаришталарини) чақирурмиз.","Асло! Сиз унга итоат этманг! Сажда қилинг ва яқин бўлинг.","Албатта, Биз уни Қадр кечасида нозил қилдик.","Қадр кечаси нима эканини сиз қаердан билар эдингиз?","Қадр кечаси минг ойдан яхшироқдир.","Унда фаришталар ва Руҳ Парвардигорларининг изни ила барча ишлар билан тушадилар.","У то тонг отгунича тинчлик-омонликдир.","Аҳли китобдан ва мушриклардан бўлган кофир кимсалар то уларга очиқ ҳужжат келгунича (куфрдан) ажрагувчи бўлмадилар.","У Аллоҳ тарафидан юборилган Пайғамбар бўлиб, покиза саҳифаларни тиловат қилур.","Уларда энг тўғри битиклар бор.","Китоб ато этилган кимсалар ўзларига очиқ ҳужжат келганидан кейингина бўлиниб кетдилар.","Ҳолбуки, улар фақат Аллоҳгагина ибодат қилишга, Унинг динигагина ихлос қилишга, бошқа динларга мойил бўлмасликка, намозни тўкис адо этишга, закот беришга буюрилган эдилар. Ана шу тўғри (йўлдаги миллат)нинг динидир.","Албатта, аҳли китобдан ва мушриклардан бўлган кофир кимсалар жаҳаннам ўтида бўлиб, ўша жойда мангу қолурлар! Ана ўшалар энг ёмон махлуқдирлар.","Албатта, иймон келтирган ва яхши амаллар қилган зотлар — ана ўшалар яралмиш жонзотларнинг энг яхшисидирлар.","Парвардигорлари ҳузуридаги уларнинг мукофотлари остидан анҳорлар оқиб ўтадиган абадий жаннатлардир. Ўша жойда мангу қолгувчидирлар. Аллоҳ улардан рози бўлди, улар ҳам (Аллоҳдан) рози бўлдилар. Бу (мукофот) Парвардигоридан қўрққан киши учундир.","Ер ўзига хос тарзда тебранганида.","Ва ер ўз юкларини чиқарганида.","Ва инсон: «Унга нима бўлди?!» – деганида.","Ўша кунда у ўз хабарини айтар.","Парвардигорингиз унга ваҳий қилгани сабабли.","Ўша кунда одамлар амалларини кўриш учун жойларидан тўда-тўда бўлиб қўзғалурлар.","Бас, ким заррача яхшилик қилса, ўшани кўрур.","Ва ким заррача ёмонлик қилса, ўшани кўрур.","Ҳарсиллаб чопадиган отларга қасам.","Ўт чақнатиб чопадиган отларга қасам.","Тонг чоғида бостириб борадиган отларга қасам.","Ўша билан чанг-тўзон кўтариб,","Шу билан тўда ичига ёриб кирган.","Албатта, инсон ўз Парвардигорига ношукрдир.","Ва, албатта, у ана шунга ўзи гувоҳдир.","Албатта, у мол-дунёга жуда ўчдир.","У билмасмики, қабрдагилар қўзғатилганда.","Ва диллардаги сирлар ошкор қилинганида.","Ўша кунда Парвардигорлари улардан, албатта, Хабардордир.","Қаттиқ қоққувчи!","Қаттиқ қоққувчи нимадир?","Қаттиқ қоққувчи нима эканини сиз қаердан билар эдингиз?!","У кунда одамлар тўзиб кетган парвоналарга ўхшаб қоладилар.","Тоғлар эса титилган жунга ўхшаб қоладилар.","Кимнинг тарозуси оғир келса.","Бас, у розилик ҳаётидадир.","Кимнинг тарозуси енгил келса.","Унинг жойи «жарлик»дир!","Унинг нима эканини сиз қаердан ҳам билар эдингиз?!","У қизиган ўтдир.","Сизларни тўплаб-кўпайтириш банд айлади!","То қабрларни зиёрат қилгунингизча.","Асло! Сизлар яқинда биласизлар.","Яна асло! Сизлар яқинда биласизлар.","Асло! Агар сизлар аниқ илм ила билганингизда эди.","Сизлар, албатта, дўзахни кўрурсизлар!","Ва яна, албатта, уни аниқ-тиниқ кўрасизлар.","Сўнгра, ўша кунда, албатта, берилган неъматлардан сўраласизлар.","Асрга қасам.","Инсон зиён-заҳматдадир.","Иймон келтирган, яхши амалларни қилган ҳамда бир-бирларига ҳақни ва сабрни тавсия қилганларгина бундан мустаснодир.","Ҳар бир обрў тўкувчи ва айбловчига ҳалокат бўлгай.","У мол тўплаб, ўшани санаш билан овора бўлиб юрган кимсадир.","У мол-дунёси уни мангу қилиб қўяди, деб ўйлайди.","Асло! Албатта, у чилпарчин қилгувчига ташланур.","Чилпарчин қилгувчи нима эканини сиз қаердан билар эдингиз?!","(У) Аллоҳнинг ёқиб қўйилган бир оловидирки,","Қалбларгача етиб боради.","Албатта, у уларнинг устига қоплангандир.","Узун-узун устунларга боғлангандир.","Парвардигорингиз фил эгаларини нима қилганини кўрмадингизми?","Уларнинг макру ҳийласини барбод этмадими?","Уларнинг устига тўп-тўп қушларни юбормадими?","Уларнинг устига сополдан бўлган тошларни отадиган (қушларни юборди).","Шу билан уларни чайнаб ташланган сомондек қилиб юбормадиларми?!","Қурайшга осон қилиб қўйилгани учун;","Уларга қиш ва ёз сафари осон қилиб қўйилгани учун;","Мана шу Уйнинг Парвардигорига ибодат қилсинлар!","У зот уларни очликдан (қутқариб) таомлантирди ва хавфу хатардан омон қилди.","Охиратни ёлғонга чиқарадиган кимсани кўрдингизми?","У етимни қўполлик билан ҳайдаб солади.","Мискинга таом беришга тарғиб қилмайди.","Бас, ҳалокат бўлгай намозхонларгаки,","Намозларидан ғофилдирлар.","Риёкорлик қиладилар.","Рўзғор буюмларини ҳам (ҳеч кимга) бермайдилар.","Биз сизга Кавсарни ато этдик.","Бас, Парвардигорингиз учун намоз ўқинг ва қурбонлик қилинг!","Сизни ёмон кўргувчи кимсанинг думи қирқилгандир.","Айтинг: «Эй кофирлар!","Мен сизлар ибодат қилаётган худоларга ибодат қилмасман.","Ва сизлар ҳам мен ибодат қиладиган (Аллоҳ)га ибодат қилгувчи эмасдирсизлар.","Мен сизлар ибодат қилган нарсага ибодат қилгувчи эмасман.","Ва сизлар ҳам мен ибодат қиладиган (Аллоҳ)га ибодат қилгувчи эмасдирсизлар.","Сизга ўз динингиз, менга ўз диним».","Аллоҳнинг ёрдами ва ғалаба келганда;","Ва одамларнинг Аллоҳнинг динига тўп-тўп бўлиб кираётганини кўрганингизда;","Дарҳол Парвардигорингизга ҳамд айтинг, тасбеҳ айтинг, истиғфор айтинг! У тавбаларни қабул қилгувчи бўлган Зотдир.","Абу Лаҳабнинг қўллари қуригай! Қуриди ҳам.","Унга моли ва касб қилиб топганлари асқотмади.","Яқинда у қизиб турган ўтга кирадир.","Ва унинг ўтин орқалаган хотини ҳам.","Унинг бўйнида эшилган арқон.","Айтинг: «У Аллоҳ бирдир.","Аллоҳ Cомад (Беҳожат)дир.","У туғмаган ва туғилмаган.","Ва ҳеч ким У зотга тенг эмас».","Айтинг: «Тонг Парвардигоридан паноҳ сўрайман.","Ўзи яратган нарсаларнинг ёмонлигидан","Зулматга чўмган кечанинг ёмонлигидан.","Ва тугунларга дам солувчиларнинг ёмонлигидан.","Ва ҳасад қилган ҳасадгўйнинг ёмонлигидан».","Айтинг: «Паноҳ сўрайман барча инсонларнинг Парвардигоридан;","Барча инсонларнинг Подшоҳидан;","Барча инсонларнинг Илоҳидан;","Яшириниб олган васвасачининг ёмонлигидан.","(Шайтонки,) инсонларнинг дилларига васваса солади.","Жин ва одамлардан бўлган»."]