Ал-Малик (Соҳибихтиёр, Фармонраво) — Он Зоте, ки ҳама чизро соҳиб аст ва бар ҳама фармон медиҳад, ки ҳокимияташ ба ҳама ҷо паҳн мешавад ва тамоми мавҷудотро ба худ тобеъ мекунад. Ӯ махлуқоташро ончунон ки хоҳад, идора мекунад ва онҳоро ба сӯи он чи барояш офарида буд, равона месозад. Ӯ соҳиб аст ва ниёз надорад, идора мекунад ва хаста намешавад, фармон медиҳад ва хато намекунад. Ӯ бар офаридаи Худ ҳукмронӣ мекунад ва бузургии Ӯ ҳамаҷониба ва дар ҳама ҷо зоҳир мешавад.