25.65-66 Күнәлардан және олардың салдарынан алыс болу үшін дұға
Бұл – Алла Тағала Кітабында соншалық көп берекелі дұғалардың бірі. Ол Оның шынайы иман келтірген және тақуа құлдары Құдіретті Жаратушыға жасайтын жалбарыну. Бұлар әлемдердің Раббысы Кітабында қайта-қайта мақтаған және бізге олардың берік иман мен көркем мінез-құлық қасиеттеріне ие екенін, лайықты істері иманы мен көркем мінезінің табиғи нәтижесі екенін хабарлаған адамдар.
«Раббымыз!» Бұл шынайы мүміндер Алла Тағалаға дұғамен жүгінгенде әдетте әдепті үндеумен, яғни Оның өздерінің Раббысы екенін мойындаумен бастайды. Жүрегі иманға толы бұл адамдар Алланы және Оның өздерінің Тәңірі әрі Раббысы екенін ұмытпайды. Ол бар нәрсені жаратқан және ерекшеліксіз барлық жаратылысына билік етуші Зат.
«Тозақ азабын аулақ қыл!» Бұл олардың дұғасының мәні, Алла Тағаладан сұрағысы келген негізгі нәрсе. Бұл тозақтағы азаптың қаншалықты қорқынышты болатынын жақсы білетін және сондықтан одан қатты қорқатын, жүрегі тірі адамдардың дұғасы. Бұл сөздерден түсінікті, олар Алла Тағаладан тек адамның иман әлсіздігінің және жаман істерінің нәтижесінен құтылуды сұрамайды. Олар Раббыдан адамды тозаққа апаратын барлық нәрседен алыстауға көмектесуін сұрайды. Осылайша, бұл бірнеше сөзді айтқанда оларға өте үлкен және өте маңызды мағына салады. Бұл дұғада иманды нығайту да, күнәлардан, бағынбаудан және жаман істерден тыйылуға көмек сұрау да бар. Өйткені мұндай жағдайларда себептің болмауы нәтижелердің де болмауын білдіреді.
«Рас оның азабы тұрақты.» Тозақ – тұрақты, өзгермейтін жамандық, мәңгілік азаптың көзі. Ол тұрғындарынан ажырамайды, өзіне борышкер болу бақытсыздығына ұшыраған адамды тыныш қалдырмайтын қатал несие беруші сияқты.
«Шынында ол; орынның да мекеннің де жаманы.» Бұл адам түсуі мүмкін орындардың ең жаманы, ең жиіркеніштісі, ең қорқыныштысы. Бұл сөздер оларды айтқан мүміндер осы мекенге түсу жазылғандардың жағдайының бар қорқынышын толық сезінгенін көрсетеді. Бұл суреттеулер олардың дұғасын одан сайын терең әрі шын жүректен етеді, құтылғандар қатарында болу ұмтылысының күшін атап көрсетеді.
Бұл дұға осы жақсы адамдардың ішкі мәнін көркем бейнелейді. Алла Тағала жақсы көретін көптеген ғажайып қасиеттерге ие болып, Оған ұнайтын көптеген лайықты істер жасаған бұл мүміндер бәрібір Алла Тағаланың ашуынан, жазасынан, тозақ отындағы азаптан қорқады; ал дүниеде бұдан қорқуға олардан әлдеқайда көп негізі бар соншама адам бар.
Алла Тағаланың мақтауына ие болған бұл мүміндер үлгі алуға лайық. Бұл дұғаның Құдіретті Раббының Кітабында айтылуы және қиямет күніне дейін оқылуы тегін емес. Бұл Алла құлдары жеткен сол биік әрі көркем дәрежеге ең болмаса жақындағымыз келмей ме?..
Бұл дұға бізге мүмін осы дүниеде өмір сүріп жатқанда Алладан қорқуы, Оның ашуын өзіне тартудан сақтануы және тозақ отын ұмытпауы, сонымен қатар қорқынышты Алла Тағаланың мейіріміне және Оттан құтылуға деген үмітпен ұштастыруы керектігін еске салады. Өйткені үміт пен қорқыныш мүмін үшін құс үшін екі қанат сияқты. Ол бір қанатпен немесе мүлдем қанатсыз ұша ала ма?..
Тозақ отынан қорған сұрау әр мүмін өмірінің табиғи әрі ажырамас бөлігі болуы керек.
Мүмін қанша жақсы іс жасаса да және Алла Тағалаға құлшылықта қаншалықты ынталы болса да, істеріне алданбауы керек. Аллаға осыған ұқсас дұғалармен жүгінетіндер біз үшін жақсы үлгі. Тіпті Раббының мақтауына ие болса да олар алданбады, Оның жолында еңбек етуден тоқтамады, Раббы алдында құрметті қорқыныш сезінуден және Оған жалбарынудан тоқтамады, жасаған көптеген жақсы істеріне толық сенбеді және Жаратушыға деген кішіпейілдігі мен әдебін жоғалтпады. Өркөкіректік, өзіне тым сенімділік, тәкаппарлық және нарциссизм мүмінге сән бола алатын қасиеттер емес.