66.8 Аллахтын нурунан жана туура жолунан ажырабоо үчүн дуба
Аллахтын Китебинен алынган бул маанилүү дуба Анын жакындары, башкача айтканда чын ыкластуу жана такыба ыймандуулар бир кезде Аллах таалага кайрылган, туруктуу кайрылган же келечекте кайрыла турган дубалардын бири.
Бул дуба менен ыймандуулар Кыямат күнү, мунафыктардагы нур өчүрүлгөндө Раббиге жалынышат. Муну көргөн ыймандуулар урматтуу коркууга толот жана кичипейилдик жана дирилдөө менен Раббиден ушул убакка чейин жолдорун жарыктандырган нурдан аларды да ажыратпоону сурашат. Алар ааламдардын Раббисинен бул куткаруучу нур максаттарына жеткенче аларга шерик болушун сурашат.
Алар жердеги жашоону да, аралык дүйнөдөгү (барзах) жашоону да камтыган сапарларынын акыркы чекитине жеткенче бул нурга муктаж экенин түшүнүшөт. Адам жалаң гана ырахат жайында түбөлүк калуу үчүн бейиш эшигинен киргенде гана эркин дем ала алат. Анткени ошондо гана ал өзүн чындап коопсуз сезет жана адамзаттын ар кандай өкүлү үчүн жашоо деп аталган негизги сыноо ийгиликтүү өтүлгөнүн, артта калганын жана ага кайтуу жок экенин түшүнөт.
Бул нурдун баалуулугуна шек келтирүүгө болбойт. Анткени атүгүл бул дүйнөдө да кап-караңгыда калып, сыйпалап жүрүүгө аргасыз болгондо өзүбүздү ыңгайсыз сезебиз, тынчсыздануу жана коркуу сезебиз жана колубузда жарык чырак менен жүрүү алда канча оңой жана ыңгайлуу болорун түшүнөбүз. Түбөлүк дүйнө, үрөйлөрү менен Кыямат күнү жөнүндө эмне деп айтууга болот? Анткени бул ар кандай адамдын жашоосундагы эң маанилүү, чечүүчү күн. Бул күнү таптакыр нурсуз калып, жолду көрбөй турганын жана кайда барарын билбей турганын түшүнүү, үмүттөнгөн ийгилигиңден из калбашы кандай болот?..
Бул дуба бизге Аллахка тобокел кылууну жана дайыма Андан жардам суроону үйрөтөт, бул бул дүйнөгө да, түбөлүк дүйнөгө да тиешелүү. Анткени Кыямат күнү жана Сырат көпүрөсүнөн өтүү ар бирибиздин алдыбызда жана баарыбыз куткарылууга, ийгиликке, Аллахтын ыраазылыгына жана бейишке умтулабыз.
Куран жана Сүннөттөн билебиз, Аллах таала ыймандуулардын дубасын кабыл кылат жана аларга берилген берекелүү нур аларга Сыраттан ийгиликтүү өтүп, түбөлүк бакытка жетип, бейишке киргенче шерик болот; алар эми алдыда жалаң гана кубаныч жана ырахат күтүп турганын, башка коркуу, оору, коркунуч, машакат жана сыноо болбой турганын түшүнүшөт. Бул чын ыклас менен ыйман келтирген, чын ыклас менен тообо кылган жана Жаратуучуга чын ыклас менен ибадат кылган бул адамдар үчүн сонун сыйлык болот.
Ыймандуулар Раббиден кечирим да сурашат, бул алардын кичипейилдигинин жана такыбалыгынын кезектеги көрүнүшү болот. Ошентип, бул дуба бизге шайтанга кулак төшөп, ар кандай жол менен кылган күнөөлөрүбүз үчүн Аллах тааладан кечирим суроо, бул күнөөлөрдөн өз убагында тообо кылууга аракет кылуу, ошондой эле кетирилген каталарды оңдоо жана алардан сабак алуу зарылдыгын эскертет. Анткени чын ыкластуу тообо жалаң гана жакшы жемиштерди берет.
Бул дубада биз жалаң гана адептүү жана ыймандууга ылайыктуу кайрылууну – «Оо, Раббибиз» гана эмес, Раббиге жакындоонун башка бир каражатын пайдаланууну да көрөбүз. Бул ыймандуулар айтат: «Сен ар нерсеге кудуреттүүсүң!» Бул Аллах тааланын чексиз кудуретин жана Ал үчүн мүмкүн эмес, кыйын жана оор эч нерсе жок экенин моюнга алуу. Ал баарына кудуреттүү жана каалаганын кылат. Албетте, Ал ар кандай жаратылышын сансыз жакшылык менен сыйлап гана койбой, ушул жакшылыктардын ар бирин туруктуу да кыла алат. Ыймандуулар Кыямат күнү кыла турган дубаларында Андан дал ушуну сурашат. Алар Андан ырайымынан, бул учурда Рабби аларга эбак берген нурдан ажыратпоону сурашат.
Марттык кылуучу жана Ырайымдуу Рабби дубаларына жооп берет, бул нурду алар муктаж болгонго чейин аларга калтырат. Дубага бул жооп жана бар жакшылыкты бекемдөө Кудуреттүү Жаратуучудан жаңы жакшылык болот. Ошентип, бул дуба бизге Аллах тааланын көптөгөн жакшылыктарын байкоону, алар үчүн Ага шүгүр кылууну жана Андан бизди бул жакшылыктардан ажыратпоону, тескерисинче, мындан ары да азыркыдан кем эмес марттык менен берүүнү суроону үйрөтөт.