27.19 Allohga yaxshiroq shukr qilishni istovchining duosi
Alloh Kitobida tasodifiy narsa yo’q va bo’lishi ham mumkin emas. Uning har bir oyatida hikmat bor va Qur’onning har bir so’ziga chuqur ma’no joylangan. Alloh Kitobida juda ko’p bo’lgan duolar ham bundan mustasno emas. Ular nafaqat iymonimizni mustahkamlaydi, qalblarimizda taqvoni uyg’otadi va Rahmli Robbimizga murojaat qila oladigan eng yaxshi so’zlarni o’rgatadi. Ular bizga mo’min Qudratli Yaratuvchidan nimani so’rashi va qalbida iymon o’rnashib mustahkamlangan kishining aziz orzulari qanday bo’lishi kerakligini yaqqol ko’rsatadi. Bu duolar yana Robbga shunday ajoyib so’zlar bilan iltijo qilgan odamlar haqida ko’proq bilishga yordam beradi. Albatta, bu duolar har bir mo’min uchun juda muhim, juda qadrli saboqlar xazinasidir. Shunday qilib, bu duolar mo’min hayotiga eng barakali ta’sir ko’rsatadi, uni nuri bilan yoritadi va Robbning roziligi va jannatiga olib boruvchi yo’lda ishonch bilan qadam tashlashiga yordam beradi.
Bu go’zal Qur’on duosi odamlarning eng yaxshilari – Uning ulug’ payg’ambarlari va elchilari (barchalariga Allohning salomi va salavoti bo’lsin) Alloh taologa murojaat qilgan duolarning ajoyib namunasidir.
Bu duo bilan olamlar Robbiga Uning ulug’ payg’ambarlaridan biri – payg’ambar Dovud o’g’li payg’ambar Sulaymon (ikkalasiga salom bo’lsin) murojaat qilgan.
Alloh taolo Sulaymonni (unga salom bo’lsin) ne’matlari bilan saxovat bilan siyladi. U nafaqat qavmini Yagona Xudoga ibodatga chaqirishi va dinini targ’ib qilishi uchun payg’ambarlik vazifasiga tanladi, balki unga hokimiyat va boylikni nazarda tutuvchi podshohlik ham ato etdi. Bu ham hammasi emas. Sulaymonga (unga salom bo’lsin) uni boshqa odamlardan ajratib turuvchi ajoyib qobiliyat berilgan edi: u hayvonlar tilini tushunardi. Payg’ambar sifatida, demak, Allohning tanlangani va eng yaxshi maxluqlaridan biri sifatida Sulaymon bu ulug’ ne’matlarni tan olar, qadrini bilar va ular uchun shukr qilar, shuningdek, boshqa payg’ambarlar kabi Robbga samimiy duolar bilan murojaat qilar edi.
«Robbim!» derdi u, Unda barcha mavjudotning Yaratuvchisi, Ne’mat beruvchisi va Egasini tan olib. Son-sanoqsiz ne’matlaring uchun Senga shukr qilishimga yordam ber va meni bunga unda. Chunki inson zaif, ko’pincha asosiy narsadan chalg’iydi va muhim narsani, jumladan, ne’matlarini Odam farzandlariga cheksiz barakali yomg’irdek yog’diradigan Yaratuvchiga doimo shukr qilish zarurligini unutadi. Sulaymon (unga salom bo’lsin) Alloh taolo ota-onasiga ato etgan ne’matlarni ham zikr qildi, chunki ajdodlarga berilgan ne’matlar avlodlarga ham foyda beradi va aksincha.
«Va Sen rozi bo’ladigan solih amallar qilishimga muyassar etgin.» Inson Alloh taologa qalbi bilan, tili bilan, shuningdek, tana a’zolarini din ma’qullagan, Uni rozi qiladigan ishlarga ishlatish bilan shukr qilishi mumkin. Shunday qilib, Allohga shukr va yaxshi amallar qilish o’rtasidagi bog’liqlik ravshan. Bunda amal Robbni rozi qiladigan bo’lishi muhim, chunki biror harakat tashqi tomondan qanchalik yaxshi ko’rinmasin, uni odamlarga ko’rsatish uchun qilish, Allohga sherik keltirish va Shariatga muvofiq kelmaslik uni har qanday qadrdan mahrum qilishi, behuda qilishi va qiluvchining harakatini yo’qqa chiqarishi mumkin.
Uning roziligini qozonishga intilib, Uni rozi qiladigan ko’plab munosib amallar qilishda Alloh taoloning yordamiga erishish har bir mo’minning aziz orzusidir. Albatta, Allohning bu ulug’ va solih payg’ambari ham bu qoidadan mustasno emas edi.
«O’z rahmating ila meni solih bandalaringga qo’shgin.» Bu bir necha so’zga ulkan ma’no joylangan, chunki buni so’rash mustahkam iymon, taqvo, yaxshi amallar qilishda va gunohlardan tiyilishda yordam hamda Alloh taoloning solih bandalarini ajratib turuvchi barcha go’zal axloqiy sifatlarga ega bo’lishni so’rash demakdir.
Bu duo bizga Alloh taolodan dunyo va din ne’matlari uchun Unga shukr qilishda, shuningdek, yaxshi amallar qilishda yordam so’rashni o’rgatadi, chunki Robbga shukr va bu dunyoda yaxshi ishlarda g’ayrat abadiy dunyoda najot va muvaffaqiyatga olib boradi. U yana amallarimiz to’g’riligi, jumladan, niyatlarimiz samimiyligi va ishlarimiz Qur’on va Sunnatga muvofiqligi haqida qayg’urishni ham o’rgatadi. Bu duo yana Allohdan Uning solih bandalari qatorida bo’lishni so’rashni o’rgatadi, chunki ular qatorida bo’lish ikki dunyoda baxtga erishish, Alloh taoloning roziligini qozonish va jannatda abadiy saodatga erishish demakdir.