21.89 Yolg'iz va vorissiz qolmaslik uchun duo
Bu Allohning ulug’ payg’ambarlari Robbilariga iltijo qilgan va Robbimizning ajoyib Kitobi bizni tanishtirgan duolardan biridir. Anbiyo surasida zikr qilingan bu duo bilan Alloh taologa payg’ambar Zakariyo (unga salom bo’lsin) murojaat qilgan.
U hayotini tavhid da’vatiga bag’ishladi va haqni lozim g’ayrat bilan targ’ib qildi. Uzoq yillar yaxshi zurriyot kutdi, ammo xotini bepusht edi. Mana, ko’p vaqt o’tdi, Zakariyo qaridi, xotini ham keksa yoshga yetdi. Go’yo boshqa kutadigan narsa qolmagandek edi.
Ammo Zakariyo (unga salom bo’lsin) Robb hamma narsaga qodir ekanini va xohlasa har qanday mo’jizani ko’rsata olishini bilardi. O’zi ham, ayniqsa, payg’ambar Iysoning (unga salom bo’lsin) kelajakdagi onasi yosh solih qiz Maryamning g’amxo’rligini o’z zimmasiga olgandan keyin Uning ko’rsatgan mo’jizalariga guvoh bo’lgan edi.
Mana, iymoni mustahkam va Robbning rahmatiga umidi o’tgan yillar bilan so’nmagan Allohning payg’ambari Alloh taologa samimiy duo bilan murojaat qildi; u Robb qalbidagini baribir bilishiga ishonar, ammo eng aziz orzularini go’zal so’zlarga solishga qat’iy ahd qilgan edi.
«Ey Robbim!» – Zakariyo (unga salom bo’lsin) duosini shunday boshladi. Ey men va xotinim ham kiradigan barcha maxluqotning Robbi! Ey hamma narsaga qodir va xohlaganiga hisobsiz ato etuvchi! Ey kechayu kunduz maxluqlariga katta va kichik, oshkor va yashirin ne’matlarning tuganmas oqimini yuboruvchi! Ey qo’rquv va umid bilan Unga iltijo qilganga javob beruvchi!
«Meni yolg’iz tashlab qo’yma.» Ey Robbim, ortimda yaxshi avlod qoldirmay yolg’iz o’lishimga yo’l qo’yma. Yer yuzida o’zimdan bir bo’lak qoldirmay o’lishimga yo’l qo’yma. Menga ilmimni meros qilib oladigan va hayoti mening hayotimning munosib davomi bo’ladigan solih farzand ato et. Menga ishimni davom ettiradigan, men uchun Senga yaxshi duolar bilan murojaat qiladigan, men Senga xizmat qilganimdek Senga xizmat qiladigan va qalbi iymonga to’la farzand ato et.
«Sen O’zing vorislarning eng yaxshisisan!» – deb tan oldi Zakariyo (unga salom bo’lsin). Sen azaliy va abadiysan. Sen doimo bo’lgansan va doimo bo’lasan. Sen maxluqlaring paydo bo’lishidan oldin mavjud bo’lgansan va ular o’lganidan keyin ham mavjud bo’lishda davom etasan, chunki ularning hammasi o’luvchidir, Sen esa o’lmassan. Sen hech qachon o’lmaysan va yo’q bo’lmaysan.
Bu Robbga yaqinlashish vositasi bo’lishi va duoga javob olishga yordam berishi kerak bo’lgan go’zal maqtov edi. Va Alloh taolo Zakariyoga ajoyib farzand – payg’ambar Yahyoni (unga salom bo’lsin) ato etdi. U haqli ravishda faxrlana oladigan va solih otasiga munosib voris bo’lishi nasib etgan farzand. Bu Alloh taoloning cheksiz qudratining, har qanday mo’jizani ko’rsata olishining va U uchun qiyin yoki imkonsiz narsa yo’qligining yana bir tasdig’i bo’ldi.
Ammo Zakariyo qissasidan bilamizki, u duo bilan cheklanib qolmadi. Bu ulug’ payg’ambar Robbning roziligini qozonish va solih zurriyot topish umidida ancha ko’p ish qildi. O’zi, Allohning barcha payg’ambarlari kabi, Uning tanlanganlaridan, demak, eng go’zal axloqiy sifatlarga ega va eng ulug’ ishlarni qiladigan odamlarning eng yaxshilaridan edi. U Robbga eng g’ayrat bilan ibodat qilar, taqvo va xudojo’ylik namunasi edi. Iymonining mustahkamligi va Robbga itoatini hech kim shubha ostiga qo’ya olmasdi.
Bu har birimiz uchun muhim saboqdir. Duo istalgan narsaga erishishning go’zal yo’lidir. Ammo Robbga duo bilan murojaat qilish bilan birga, o’zimiz ustida ishlashimiz, qalbimizda Unga muhabbat, taqvo, Unga tavakkulni tarbiyalashimiz, o’zimizni umidlarni Unga bog’lashga va Uning oldida ehtiromli qo’rquv his qilishga o’rgatishimiz kerak.
Shuni ham ta’kidlash muhimki, Qur’onda zikr qilingan duolar mazmunan turlicha bo’lsa ham va ular bilan Robbga turli odamlar turli davrlarda iltijo qilgan bo’lsa ham, ularni odob va samimiyat bilan yo’g’rilganlik birlashtiradi. Biz ham bugun qo’llarimizni ko’tarib Robbga duo bilan murojaat qilmoqchi bo’lganimizda, ayniqsa, biz uchun chindan ham muhim narsani Undan so’ramoqchi bo’lganimizda buni unutmasligimiz kerak.
Eng muhimi, bu duo barcha farzandsiz er-xotinlarga bu ulug’ payg’ambar yo’qotmagani kabi Allohning rahmatiga umidlarini yo’qotmasliklari kerakligini eslatadi. Oramizdan nechtamizga uzoq yillar davomida umidni yo’qotmay Unga qayta-qayta iltijo qilishga iymon va sabr yetadi?..